धन्यस् त्वं सहकार सम्प्रति फलैः काकान् शुकान् पूरयन्
पूर्वं तु त्वयि मुक्तमञ्जरिभरोन्निद्रे य इन्दिन्दरः ।
आक्रीडन्न् अनिशं स नैति फलितं यत् त्वां विकशैकभुक्
तद्धर्मोऽस्य फलाशया परिचयः कल्पद्रुमेऽप्य् अस्ति किम् ॥१७९१॥
वल्लभस्य । (सु।र। ११०३)
निश्चेत्तुं मकरन्दबिन्दुजनितानन्दारविन्दाकर
क्रीडानिःस्पृहयालुमानसतया मन्दायमानादरः ।
स्फारोद्गच्छदपूर्वमञ्जरिभरप्रादुर्भवत्सौरभं
श्रद्धालुर् न कथं प्रयातु सहसा माकन्दम् इन्दिन्दरः ॥१७९२॥
तस्यैव ।
अयम् इह मुग्धो मधुपः परिहृतसहकारमञ्जरीपुञ्जः ।
असरलम् अरसम् असारं शाखोटकविटपम् अनुसरति ॥१७९३॥
कस्यचित् ।
स्वादयन्तु चिरं नाम कोकिलाश् चूतकोरकान् ।
तादृक् परिमलं वेत्ति यदि धन्यो मधुव्रतः ॥१७९४॥
वसुकल्पस्य ।
वसन्ते सन्त्य् एव प्रतिवनम् अनिद्रालुसुमनो
मनोज्ञप्रारम्भा मधुरमधुसम्भारसुहृदः ।
परोलक्षा वृक्षाः परम् इह रसालेषु रसिकः
सलीलं रोलम्बः पिबति मधुसारं सरभसः ॥१७९५॥
वनमालिनः ।