यात्रालग्नं शिशिरमरुतां बान्धवः कुन्दलक्ष्याः
कालं सोऽयं कमलसरसां सम्पदः कालभूतः ।
निद्राव्याजाज् जडिमविधुरा यत्र गाढे हिमर्तौ
रामाः कण्ठग्रहम् अशिथिलं प्रेयसाम् आद्रियन्ते ॥१३२६॥
कस्यचित् । (सु।र। २९३)
गर्वायन्ते पलालं प्रति पथिकशतैः पामराः स्तूयमाना
गोपान् गोगर्भिनीनां सुखयति बहलो रात्रिरोमन्थबाष्पः ।
प्रातः पृष्ठावगाढप्रथमरविरुचिर् ग्रामसीमोपशल्ये
शेते सिद्धार्थपुष्पच्छदनिचितहिमक्लिन्नपक्ष्मा महोक्षः ॥१३२७॥
योगेश्वरस्य । (सु।र। २९७)
दिग्भागेषु हिमावृतिः प्रतिदिनं सान्द्रापि सान्द्रायते
प्रालेयैः पिहितप्रभो दिनपतिर् मन्दोऽपि मन्दायते ।
भर्तुर् मान्द्यशुचेव हन्त दिवसः क्षीणोऽप्य् अयं क्षीयते
तत्सङ्कोचनिरर्गलेव रजनी दीर्घापि दीर्घायते ॥१३२८॥
लक्ष्मीधरस्य ।
पाकं यत्र न याति पाणिजभ्दिआ यत्रातिशीतार्तिभिर्
मानच्छेदनिवेदनं रतिकलावृत्तिक्षमा यत् क्षपा ।
जारन्यस्तरदच्छदव्रणसमाधानाय यन् मारुतस्
तेऽमी सन्ततकूटक्ÿप्तकुलटामोदा मुदे वासराः ॥१३२९॥
आचार्यगोपीकस्य ।
उद्ग्रीवा विवृतारुणास्यकुहरास् तृष्णाचलत्तालवः
पक्षासम्भववेपमानतनवः प्रोड्डीय किञ्चिन् मुहुः ।
अन्योन्याक्षमिणः शरारिशिशवः प्रातर् नदीरोधसि
प्रालेयाम्बु पिबन्ति वीरणदलद्रोणी प्रणालीस्रुतम् ॥१३३०॥
कस्यचित् । (सु।र। ११५१)