आरक्ताङ्कुरदन्तुरा कमलिनी नायामिनी यामिनी
स्तोकोन्मुक्ततुषारम् अम्बरमणेर् ईषत् प्रगल्भं महः ।
अप्य् एते सहकारसौरभमुचो वाचालिताः कोकिलैर्
आयान्ति प्रियविप्रयुक्तयुवतीमर्मच्छिदो वासराः ॥१२३६॥
सङ्घश्रीयः । (सु।र। १५२)
मन्दं दक्षिणम् आह्वयन्ति पवनं पुंस्कोकिलव्याहृतैः
संस्कुर्वन्ति वनस्थलीः किसलयोत्तंसिर् निषण्णालिभिः ।
चन्द्रं सुन्दरयन्ति मुक्ततुहिनप्रावारया ज्योत्स्नया
वर्धन्ते च विवर्धयन्ति च मुहुस् तेऽमी स्मरं वासराः ॥१२३७॥
(कस्यचित्; सु।र। १६१)
एते सम्प्रति वैमनस्यम् अनिशं निःशङ्कम् आतन्वते
कान्तारस्थलपद्मिनीपरिमलैर् आनन्दितेन्दिन्दिराः ।
उन्मीलत्सहकारकाननतटीवाचालपुंस्कोकिल
ध्वानाकर्णनकान्दिशीकपथिकावस्कन्दिनो वासराः ॥१२३८॥
(योगेश्वरस्य)
धिन्वन्त्यमू… मदमूर्च्छदलिध्वनीनि
धूताध्वनी…हृदयानि मधोर् दिनानि ।
निस्तन्द्रचन्द्रवदनावदनारविन्द
सौरभ्यसौहृदसगर्वसमीरणानि ॥१२३९॥
(कस्यचित्)
स्तोकस्तोकनिवर्तमानतुहिनोन्मीलन्नवाम्भोजिनी
सङ्क्रान्तैर् अलिभिर् मुखेषु ककुभां क्ÿप्तालकश्रेणयः ।
तत्तन्मन्मथबन्धुवार्तिकपिकप्रारब्धबीजाङ्कुर
व्याख्यातक्षुभिताध्वनीनमनसो धिन्वन्त्य् अमी वासराः ॥१२४०॥
(हरेः)
१५४वसन्ततरवः
मिथः क्रीडालोलभ्रमरभरभग्नाङ्कुररस
प्रेसेकप्रोन्मीलत्परिमलसमालब्धपवनः ।
इतोऽप्य् एष श्रीमान् अविरलम् इदानीं मुकुलितः
प्रयच्छत्य् उन्मादान् अहह सहकारद्रुमयुवा ॥१२४१॥
कस्यचित् । (सु।र। १८७)
साम्यं सम्प्रति सेवते विचकिलं षाण्मासिकैर् मौक्तिकैर्
वाह्लीकीदशनव्रणारुणतरैः पत्रैर् अशोकोर्चितः ।
भृङ्गीलङ्घितकोटि किंशुकम् इदं किञ्चिद् विवृन्तायते
माञ्जिष्ठैर् मुकुलैश् च पाटलितरोर् वृत्तैव काचिल् लिपिः ॥१२४२॥
राजशेखरस्य । (वि।शा।भ। १।२५, सु।र। १६५)
वह्निर् मन्ये हिमजलभयात् संश्रितः किंशुकेषु
श्यामं धूमैः स खलु कुरुते काननं कोरकाख्यैः ।
सन्तापार्थं कथम् इतरथा पान्थसीमन्तिनीनां
पुष्पव्याजाद् विसृजति शिखाश्रेणिम् उद्गाढशोणाम् ॥१२४३॥
कस्यचित् । (सु।र। १७६ पौतायनेः)
इदानीं प्लक्षाणां जठरदलविश्लेषचतुरः
शिखानाम् आबन्धः स्फुरति शुकचञ्चूपुटनिभः ।
ततः स्त्रीणां हन्त क्षमम् अधरकान्तिं कलयितुं
समन्तान् निर्याति स्फुटसुभगरागं किसलयम् ॥१२४४॥
वामनस्य ।
परागैर् आदिग्धाः परिमिलितपिष्टातकनिभैर्
मरुल्लोलच्छाखं मधुपरवगीतं विदधतः ।
पलाशैः काश्मीरारुणवसनकल्पैर् निवसिता
द्रुमा राजन्त्य् एते मधुदिवसरम्योत्सवभृतः ॥१२४५॥
वसन्तसेनस्य ।