काव्ये विश्वासटिप्पन्यः

विश्वास-प्रस्तुतिः - २३४६

सृजति तावद् अशेषगुणाकरं
पुरुषरत्नम् अलङ्करणं भुवः ।
तद् अनु तत्क्षणभङ्गि करोति चेद्
अहह कष्टम् अपण्डितता विधेः ॥२३४६॥

मूलम् - २३४६

कस्यचित् । (स्व् ३१२६, शा।प। ४०००, सू।मु। १३१।३९, सु।र। १४७३)

विश्वास-प्रस्तुतिः - २३४७

अध्वश्रमाय चरणौ विरहाय दारा
अभ्यर्थनाय वचनं न वपुर् जरायै ।
एतानि मे विदधतस् तस्य सर्वदैव
धातस् त्रपा न यदि किं न परिश्रमो’पि ॥२३४७॥

मूलम् - २३४७

राजशेखरस्य । (सु।र। १३२१)

विश्वास-प्रस्तुतिः - २३४८

आलम्बनाय धरणी न च नागभूमीः
स्वर्वासिनां च वसतिर् भवेद् अमुष्य ।
पूर्वार्जिताशुभवशीकृतपौरुषस्य
कल्पद्रुमो’पि न समीहितम् आतनोति ॥२३४८॥

मूलम् - २३४८

कस्यचित् । (सु।र। १०९७)

विश्वास-प्रस्तुतिः - २३४९

गुणवत् पक्षपराङ्मुखि स्वजनकुलोच्छेदबद्धनिर्बन्धे ।
अपि वीरवंशवैरिणि भगवति भवितव्यते जयसि ॥२३४९॥

मूलम् - २३४९

उमापतिधरस्य ।

विश्वास-प्रस्तुतिः - २३५०

विद्वत्ता धनसङ्गता चिरतरं नाकारि नाकारि चेज्
ज्योत्स्नासुन्दरविग्रहः प्रतिदिशं सम्पूर्णबिम्बः शशी ।
आमृत्यु स्तनजन्मयौवनमदो नाकारि वामभ्रुवां
धिक् धातारम् अकारि येन जगति व्यङ्गः स गङ्गाधरः ॥२३५०॥

मूलम् - २३५०

कस्यचित् ।