काव्ये विश्वासटिप्पन्यः

विश्वास-प्रस्तुतिः - १८१६

मृगेन्द्रं वा मृगारिं वा हरिं व्याहरतां जनः ।
तस्य द्वयम् अपि क्रीडा क्रीडादलितदन्तिनः ॥१८१६॥

मूलम् - १८१६

कस्यचित् । (शा।प। ९०१)

विश्वास-प्रस्तुतिः - १८१७

किं जातैर् बहुभिः करोति हरिणी पुत्रैर् अकार्यक्षमैः
पुत्रेणापि वनान्तरे विचलता यैः सार्धम् उत्त्रस्यति ।
एकेनापि करीन्द्रकुम्भदलनव्यापारशक्तात्मना
सिंही दीर्घपराक्रमेण बलिना पुत्रेण गर्वायते ॥१८१७॥

मूलम् - १८१७

भानोः ।

विश्वास-प्रस्तुतिः - १८१८

उत्क्रान्तं गिरिकूटलङ्घनसहं ते वज्रसारा नखास्
तत्तेजश् च तद् ऊर्जितं स च नगोन्माथी निनादो महान् ।
आलस्याद् अविमुञ्चता गिरिगुहां सिंहेन निद्रालुना
सर्वं विश्वजयैकसाधनम् इदं लब्धं न किञ्चित् कृतम् ॥१८१८॥

मूलम् - १८१८

कस्यचित् । (सु।र। १०३५)

विश्वास-प्रस्तुतिः - १८१९

विस्रं वपुः परवधप्रवणं च करम्
तिर्यक्तयैव विदितः सदसद्विवेकः ।
इत्थं न किञ्चिद् अपि चारु मृगाधिपस्य
तेजस् तु तत् किम् अपि येन जगद्वराकम् ॥१८१९॥

मूलम् - १८१९

वसुन्धरस्य । (सु।र। १०९१)

विश्वास-प्रस्तुतिः - १८२०

असञ्ज्ञाः खल्व् एते जलशिखिमरुद्धूसनिचयाः
प्रकृत्या गर्जन्ति त्वयि तु भुवनं निर्मदमदः ।
प्रसीद प्रारम्भाद् विरम विनयेथाः क्रुधम् इमां
हरे जीमूतानां ध्वैर् इयम् उदीर्णो न करिणाम् ॥१८२०॥

मूलम् - १८२०

अमरसिंहस्य । (सु।र। १०७१)