काव्ये विश्वासटिप्पन्यः

विश्वास-प्रस्तुतिः - १२०६

अक्ष्णोर् मञ्जुलम् अञ्जनं चरणयोर् नीलाश्मजौ नूपुरा
वङ्गे नीलपटः स्फुटं मृगमदन्यासः कपोलस्थले ।
यत्प्रीत्या परिशीलितं परदृशां रोधाय तत् साम्प्रतं
नेपथ्यस्य विधाव् अपीदम् असतीजातस्य जातं तमः ॥१२०६॥

मूलम् - १२०६

वापीकस्य ।

विश्वास-प्रस्तुतिः - १२०७

उत्सारितो हसितदीधितिभिः कपोलाद्
एकावलीभिर् अवधूत इव स्तनेभ्यः ।
अङ्गेष्व् अलब्धपरिभोगसुखो’न्धकारो
गृह्णाति केशरचनासु रुषेव नारीः ॥१२०७॥

मूलम् - १२०७

गणपतेः । (सु।र। ८९२)

विश्वास-प्रस्तुतिः - १२०८

अद्रिष्वञ्जनपुञ्जकान्ति जलदप्रायं च मूले दिशाम्
ऊर्ध्वं नीलवितानकल्पभवनौ जम्बाललेपोपमम् ।
तीरे नीरनिधेस् तमालविटपिच्छायां च सायं शनैर्
उद्गच्छत्य् अभिसारिकाप्रियतमप्रेमानुकूलं तमः ॥१२०८॥

मूलम् - १२०८

झञ्झानिलस्य ।

विश्वास-प्रस्तुतिः - १२०९

यत्र तत्र रतिसज्जबन्धकी
प्रीतये मदनशासनाद् इव ।
नीलकाण्डपटताम् उपाययौ
सूचिभेद्यनिविडं निशातमः ॥१२०९॥

मूलम् - १२०९

धोयीकस्य ।

विश्वास-प्रस्तुतिः - १२१०

उद्धूता धूमधारा विरहिजनमनोमाथिनो मन्मथाग्नेः
कस्तूरीपत्रमाला तिमिरततिर् अहो दिक्पुरन्ध्रीमुखानाम् ।
निर्वाणाङ्गारलेखा दिवसहुतभुजः सञ्चरच्चञ्चरीक
श्रेणीयं भाति भास्वत्करलुलितनभःकन्दरेन्दीवरस्य ॥१२१०॥

मूलम् - १२१०

गोवर्धनस्य ।