काव्ये विश्वासटिप्पन्यः

विश्वास-प्रस्तुतिः - १०१६

वक्त्रेन्दुर् मृगलाञ्छनेन वलितः पत्रावलीसङ्गमात्
कण्ठे कम्बुविडम्बिनि द्विगुणितास् तारापहारस्रजः ।
दोर्वल्लीयुगले मृणालसुहृदि ग्रन्थिभ्रमायाङ्गदं
मन्ये भूषणम् एव दूषणपदे तत् प्राप्य तस्या वपुः ॥१०१६॥

मूलम् - १०१६

विरिञ्चेः ।

विश्वास-प्रस्तुतिः - १०१७

कौसुम्भं कुचकुम्भयोर् निवसनं सौवर्णिकं कर्णयोस्
ताडङ्कद्वयम् आञ्जनी नयनयोर् आलेख्यलेखालिपिः ।
काश्मीरेण तमालपत्रम् अलिके हैमी करे कङ्कण
श्रेणिः पाशयितुं जगन्त्य् अलम् अलङ्काराः कुरङ्गीदृशः ॥१०१७॥

मूलम् - १०१७

उमापतिधरस्य ।

विश्वास-प्रस्तुतिः - १०१८

दीर्घापाङ्गं नयनयुगलं भूषयत्य् अञ्जनश्रीस्
तुङ्गाभोगौ प्रभवति कुचाव् अर्चितुं हारयष्टिः ।
मध्यक्षामे वपुषि लभते स्थाम कूर्पासलक्ष्मीः
श्रोणीबिम्बे गुरुणि रशनादामशोभां बिभर्ति ॥१०१८॥

मूलम् - १०१८

कस्यचित् ।

विश्वास-प्रस्तुतिः - १०१९

कण्ठे मौक्तिकमालिका स्तनतटे कार्पूरमध्यं रजः
सान्द्रं चन्दनम् अङ्गके वलयिता पाणौ मृणालीलता ।
तन्वी नक्तम् इयं चकास्ति शुचिनी चीनांशुके बिभ्रती
शीतांशोर् अधिदेवतेव गलिता व्योमाग्रम् आरोहितः ॥१०१९॥

मूलम् - १०१९

राजशेखरस्य । (वि।शा।भ। ३।१६, सु।र। ३८५)

विश्वास-प्रस्तुतिः - १०२०

इन्दोश् चन्दनबिन्दुनैव दशनच्छायं तदीयं मुखं
चक्रं लोचनभल्लमार्जनविधौ शाणस्य तत् कुण्डलम् ।
भिन्नानां कुचकन्दरा स्मितसुधाकुल्येव मुक्तावली
पादाब्जे ध्वनदिन्द्रनीलवलयं रोलम्बमालैव सा ॥१०२०॥

मूलम् - १०२०

शाण्डिल्यस्य ।