काव्ये विश्वासटिप्पन्यः

विश्वास-प्रस्तुतिः - ८६१

निहिता मणिमेखला नितम्बे
तरला हारलता कुचद्वये च ।
अनयाहम् अलङ्कृतो न कस्मा
दिति तस्यास् तनुताम् इयाय मध्यम् ॥८६१॥

मूलम् - ८६१

कुञ्जस्य ।

विश्वास-प्रस्तुतिः - ८६२

अहं तनीयानतिकोमलश् च
स्तनद्वयं वोढुम् अलं न तावत् ।
इतीव तत्संवहनार्थम् अस्या
वलित्रयं पुष्यति मध्यभागः ॥८६२॥

मूलम् - ८६२

धोयीकस्य ।

विश्वास-प्रस्तुतिः - ८६३

लावण्यपुण्यसलिलौघमहार्घतीर्थे
तस्या वलित्रय तरङ्गिणि मध्यदेशे ।
निर्वाणम् ऋच्छति मनः सहजैकतान
मस्मिन् मुहुः किम् अनुभावयतीव दृष्टिः ॥८६३॥

मूलम् - ८६३

हरेः ।

विश्वास-प्रस्तुतिः - ८६४

तनुत्वरमणीयस्य मध्यस्य च भुजस्य च ।
अभवन् नितरां तस्या वलयः कान्तिबद्धये ॥८६४॥

मूलम् - ८६४

कस्यचित् । (स।क।आ। २।१५९, सू।मु। ५३।६४)

विश्वास-प्रस्तुतिः - ८६५

कुचकलशमहिम्ना श्रोणिभारप्रथिम्ना
विहितनिविडपीडास् तां द्वयीम् उद्विषन्तः ।
चिरम् उदरतरङ्गश्रेणिमार्गेण यासां
भ्रुकुटिम् इव वहन्ति क्रोधतो मध्यभागाः ॥८६५॥

मूलम् - ८६५

राजशेखरस्य ।