काव्ये विश्वासटिप्पन्यः

विश्वास-प्रस्तुतिः - ८५६

रोमावली कनकचम्पकदामगौर्या
लक्ष्मीं तनोति नवयौवनसम्भृतश्रीः ।
त्रैलोक्यलब्धविजयस्य मनोभवस्य
सौर्वर्णपट्टलिखितेव जयप्रशस्तिः ॥८५६॥

मूलम् - ८५६

कस्यचित् । (सु।र। ३९४)

विश्वास-प्रस्तुतिः - ८५७

रोमावली सत्रिवली तरङ्ग
नाभीह्रदस्योपरि राजते’स्याः ।
मुखेन्दुभीतस्तनचक्रवाक
वक्त्रच्युता शैवलमञ्जरीव ॥८५७॥

मूलम् - ८५७

धोयीकस्य ।

विश्वास-प्रस्तुतिः - ८५८

दग्धे मनोभवतरौ बाला कुचकुम्भसम्भृतैर् अमृतैः ।
त्रिवलीकृतालबाला जाता रोमावलीवल्ली ॥८५८॥

मूलम् - ८५८

भासस्य ।

विश्वास-प्रस्तुतिः - ८५९

उद्धृतः स्तनभार एष तरले नेत्रे चले भ्रूलते
रागाधिष्ठितमोष्ठपल्लवम् इदं कुर्वन्तु नाम व्यथाम् ।
सौभाग्याक्षरमालिकेव लिखिता पुष्पायुधेन स्वयं
मध्यस्थापि करोति तापम् अधिकं रोमावली केन मे ॥८५९॥

मूलम् - ८५९

कस्यचित् । (स्व् १३५४)

विश्वास-प्रस्तुतिः - ८६०

हरति रतिपतेर् नितम्बबिम्ब
स्तनतटचङ्क्रमसङ्क्रमस्य लक्ष्मीम् ।
त्रिवलिभवतरङ्गनिम्ननाभी
ह्रदपदवीम् अधिरोमराजिर् अस्याः ॥८६०॥

मूलम् - ८६०

जयदेवस्य ।