विश्वास-प्रस्तुतिः - ५७१
कान्तिं कुङ्कुमकेशरान् मधुरतां द्राक्षारसस्यासवाद्
वैदर्भीपरिपाकपूतवचसः काव्यात् कवेर् मार्दवम् ।
पार्श्वाद् एव जरातुरेण विधिना तं तं गृहीत्वा गुणं
सृष्टा हन्त हरन्ति कस्य न मनः कश्मीरवामभ्रुवः ॥५७१॥
मूलम् - ५७१
कान्तिं कुङ्कुमकेशरान् मधुरतां द्राक्षारसस्यासवाद्
वैदर्भीपरिपाकपूतवचसः काव्यात् कवेर् मार्दवम् ।
पार्श्वाद् एव जरातुरेण विधिना तं तं गृहीत्वा गुणं
सृष्टा हन्त हरन्ति कस्य न मनः कश्मीरवामभ्रुवः ॥५७१॥
उमापतिधरस्य ।
विश्वास-प्रस्तुतिः - ५७२
हूणीनां हरिणाङ्कपाण्डुमधुरश्रीभाजि गण्डस्थले
शोभां काम् अपि बिभ्रति प्रणिहिताः कश्मीरविच्छित्तयः ।
अप्य् आसां स्तनमण्डले परिणमन् मालूरगौरे श्रियं
सन्धत्ते नवसान्ध्यरश्मिरुचिरं माञ्जिष्ठपट्टांशुकम् ॥५७२॥
मूलम् - ५७२
हूणीनां हरिणाङ्कपाण्डुमधुरश्रीभाजि गण्डस्थले
शोभां काम् अपि बिभ्रति प्रणिहिताः कश्मीरविच्छित्तयः ।
अप्य् आसां स्तनमण्डले परिणमन् मालूरगौरे श्रियं
सन्धत्ते नवसान्ध्यरश्मिरुचिरं माञ्जिष्ठपट्टांशुकम् ॥५७२॥
तस्यैव ।
विश्वास-प्रस्तुतिः - ५७३
उत्तरापथकान्तानां किं ब्रूमो रामणीयकम् ।
यासां तुषारसम्भेदे न म्लायति मुखाम्बुजम् ॥५७३॥
मूलम् - ५७३
उत्तरापथकान्तानां किं ब्रूमो रामणीयकम् ।
यासां तुषारसम्भेदे न म्लायति मुखाम्बुजम् ॥५७३॥
अमृतदत्तस्य ।
विश्वास-प्रस्तुतिः - ५७४
अत्रार्द्रचन्दनकुचार्पितसूत्रहार
सीमन्तचुम्बिसिचयस्फुटबाहुमूलः ।
दूर्वाप्रकाण्डरुचिरासु गुरूपभोगो
गौडाङ्गनासु चिरम् एष चकास्ति वेषः ॥५७४॥
मूलम् - ५७४
अत्रार्द्रचन्दनकुचार्पितसूत्रहार
सीमन्तचुम्बिसिचयस्फुटबाहुमूलः ।
दूर्वाप्रकाण्डरुचिरासु गुरूपभोगो
गौडाङ्गनासु चिरम् एष चकास्ति वेषः ॥५७४॥
राजशेखरस्य ।
विश्वास-प्रस्तुतिः - ५७५
वासः सूक्ष्मं वपुषि भुजयोः काञ्चनी चाङ्गदश्रीर्
मालागर्भः सुरभिमसृणैर् गन्धतैलैः शिखण्डः ।
कर्णोत्तंसे नवशशिकला निर्मलं तालपत्रं
वेशः केषां न हरति मनो बङ्गवाराङ्गनानाम् ॥५७५॥
मूलम् - ५७५
वासः सूक्ष्मं वपुषि भुजयोः काञ्चनी चाङ्गदश्रीर्
मालागर्भः सुरभिमसृणैर् गन्धतैलैः शिखण्डः ।
कर्णोत्तंसे नवशशिकला निर्मलं तालपत्रं
वेशः केषां न हरति मनो बङ्गवाराङ्गनानाम् ॥५७५॥
कस्यचित् ।