काव्ये विश्वासटिप्पन्यः

विश्वास-प्रस्तुतिः - ४६१

सुधासूतेर् बन्धुर् मधुसहचरः पञ्चमरुचि
दिशंल्लीला बह्वीः कुवलयदृशां नर्मणि गुरुः ।
स देवः शृङ्गारी हृदयवसतिः पञ्चविशिखः
सदा स्वादून् कुर्वन् मधुमदविकारान् विजयते ॥४६१॥

मूलम् - ४६१

राजशेखरस्य ।

विश्वास-प्रस्तुतिः - ४६२

अन्तर्बहिस् त्रिजगतीरसभावविद्वान्
यो नर्तयत्य् अखिलदेहभृतां कुलानि ।
क्षेमं ददातु भगवान् परमादिदेवः
शृङ्गारनाटकमहाकविर् आत्मजन्मा ॥४६२॥

मूलम् - ४६२

भवानन्दस्य ।

विश्वास-प्रस्तुतिः - ४६३

जयति स मदलेखोच्छृङ्खलप्रेमरामा
ललितसुरतलीलादैवतं पुष्पचापः ।
त्रिभुवनजयसिद्धौ यस्य शृङ्गारमूर्ते
रुपकरणम् अपूर्वं माल्यम् इन्दुर् मधूनि ॥४६३॥

मूलम् - ४६३

उत्पलराजस्य । (सु।र। ३३२)

विश्वास-प्रस्तुतिः - ४६४

मनसि कुसुमबाणैर् एककालं त्रिलोकीं
कुसुमधनुर् अनङ्गस् ताडयत्य् अस्पृशद्भिः ।
इति विततविचित्राश्चर्यसङ्कल्पशिल्पो
जयति मनसिजन्मा जन्मिभिर् मानिताङ्गः ॥४६४॥

मूलम् - ४६४

कस्यचित् । (सु।र। ३२५)

विश्वास-प्रस्तुतिः - ४६५

याच्यो न कश्चन गुरुः प्रतिमा च कान्ता
पूजा विलोकननिगूहनचुम्बनानि ।
आत्मा निवेद्यम् इतरव्रतसारजेत्रीं
वन्दामहे मकरकेतन देव दीक्षाम् ॥४६५॥

मूलम् - ४६५

वल्लनस्य । (सु।र। ३३३)