काव्ये विश्वासटिप्पन्यः

विश्वास-प्रस्तुतिः - ३१६

बद्धेनाञ्जलिना नतेन शिरसा गात्रैः सरोमोद्गमैः
कण्ठेन स्वरगद्गदेन नयनेनोद्गीर्णबाष्पाम्बुना ।
नित्यं त्वच्चरणारविन्दयुगलध्यानामृतास्वादिनाम्
अस्माकं सरसीरुहाक्ष सततं सम्पद्यतां जीवितम् ॥३१६॥

मूलम् - ३१६

श्रीकुलशेखरस्य । (मुकुन्दमाला २५)

विश्वास-प्रस्तुतिः - ३१७

नास्था धर्मे न वसुनिचये नैव कामोपभोगे
यद् भाव्यं तद् भवतु भगवन् पूर्वकर्मानुरूपं ।
एतत् प्रार्थ्यं मम बहु मतं जन्मजन्मान्तरे’पि
त्वत्पादाम्भोरुहयुगगता निश्चला भक्तिर् अस्तु ॥३१७॥

मूलम् - ३१७

तस्यैव । (मुकुन्दमाला ७)

विश्वास-प्रस्तुतिः - ३१८

मज्जन्मनः फलं इदं मधुकैतभारे
मत्प्रार्थनीयमदनुग्रह एष एव ।
त्वद्भृत्यभृत्यपरिचारकभृत्यभृत्य
भृत्यस्य भृत्य इति मां स्मर लोकनाथ ॥३१८॥

मूलम् - ३१८

तस्यैव । (मुकुन्दमाला ३२)

विश्वास-प्रस्तुतिः - ३१९

नाहं वन्दे तव चरणयोर् द्वन्द्वम् अद्वन्द्वहेतोः
कुम्भीपाकं गुरुम् अपि हरे नारकं नापनेतुं ।
रम्यारामामृदुतनुलता नन्दने नापि रन्तुं
भावे भावे हृदयभवने भावयेयं भवन्तं ॥३१९॥

मूलम् - ३१९

तस्यैव । (मुकुन्दमाला ६)

विश्वास-प्रस्तुतिः - ३२०

मुकुन्द मूर्ध्ना प्रणिपत्य याचे
भवन्तं एकान्तं इयन्तम् अर्थं ।
अविस्मृतिस् त्वच्चरणारविन्दे
भवे भवे मे’स्तु भवत्प्रसादात् ॥३२०॥

मूलम् - ३२०

तस्यैव । (मुकुन्दमाला ४)