काव्ये विश्वासटिप्पन्यः

विश्वास-प्रस्तुतिः - १०६

यान् उद्धूलयतीश्वरः सिकतिला यैर् मौलिमन्दाकिनी
यैर् बालेन्दुकणार्द्रकेतकदलोत्सङ्गे परागायितम् ।
यैः कैलासविलासकाननतटीकङ्केल्लिपुष्पोद्गम
क्रीडाकार्मणम् अद्रिजाचरणयोस् ते रेणवः पान्तु वः ॥१०६॥

मूलम् - १०६

उमापतिधरस्य ।

विश्वास-प्रस्तुतिः - १०७

लाक्षारागं हरति शिखराज् जाह्नवीवारि येषां
ये तत्वन्ति स्रजम् अधिजटामण्डलं मालतीनाम् ।
प्रत्युत्सर्पद्विमलकिरणैर् यैस् तिरोधानम् इन्दोर्
देव्याः स्थाणौ चरणपतिते ते नखाः पान्तु विश्वम् ॥१०७॥

मूलम् - १०७

कस्यचित् । (सु।र। ८१, दक्षस्य)

विश्वास-प्रस्तुतिः - १०८

भवजलधिजलावलम्बयष्टिर्
महिषमहासुरशैलवज्रधारा ।
हरहृदयतडागराजहंसी
दिशतु शिवं भवतश् चिरम् ॥१०८॥

मूलम् - १०८

भगीरथदत्तस्य । (सु।र। ८६)

विश्वास-प्रस्तुतिः - १०९

कां तपस्वी गतो’वस्थाम् इति स्मेराव् इव स्तनौ ।
वन्दे गौरीघनाश्लेषभवभूतिसिताननौ ॥१०९॥

मूलम् - १०९

भवभूतेः ।

विश्वास-प्रस्तुतिः - ११०

अभिमतफलसिद्धिसिद्धमन्त्रा
वलि बलिजित्परमेष्टिनोर् उपास्ये ।
भगवति मदनारिनारि वन्दे
निखिलनगाधिपभर्तृदारिके त्वाम् ॥११०॥

मूलम् - ११०

वामदेवस्य ।