०१० हरशिरोगङ्गा

विश्वास-प्रस्तुतिः - ४६

कपाले गम्भीरः कुहरिणि जटासन्धिषु कृशः
समुत्तानश् चूडाभुजगमणिबन्धव्यतिकरे ।
मृदुर् लेखाकोणे रयवशविलोलस्य शशिनः
पुनीताद् दीर्घं वो हरशिरसि गङ्गाकलकलः ॥४६॥

मूलम् - ४६

योगेश्वरस्य । (सु।र। ५३)

विश्वास-प्रस्तुतिः - ४७

स जयति गाङ्गजलौघः शम्भोर् उत्तुङ्गमौलिविनिविष्टः ।
मज्जति पुनर् उन्मज्जति चन्द्रकला यत्र शफरीव ॥४७॥

मूलम् - ४७

कस्यचित् । (सु।र। ४५)

विश्वास-प्रस्तुतिः - ४८

यच्चन्द्रकोटिकरकोरकभावभाजि
बभ्राम बभ्रुणि जटापटले हरस्य ।
तद् वः पुनातु हिमशैलशिलानिकुञ्ज
सात्कारडम्बरविरावि सुरापगाम्भः ॥४८॥

मूलम् - ४८

कस्यचित् । (स।क।आ। १।७७)

विश्वास-प्रस्तुतिः - ४९

गौरीविभज्यमानार्धसङ्कीर्णे हरमूर्धनि ।
अम्ब द्विगुणगम्भीरे भागीरथि नमो’स्तु ते ॥४९॥

मूलम् - ४९

कस्यचित् । (सु।र। ७८, सू।मु। १।२४)

विश्वास-प्रस्तुतिः - ५०

मुक्ताभा नृकपालशुक्तिषु जटावल्लीषु मल्लीनिभा
बह्वौ लाजनिभा दृशोर् मणिनिभा भोगोत्करे भोगिनः ।
नृत्यावर्तपरम्परेरितपयः मूर्च्छनोच्छालिताः
खेलन्तो हरमूर्ध्नि पान्तु भवतो गङ्गापयोबिन्दवः ॥५०॥

मूलम् - ५०

नडगाङ्गोकस्य ॥ शा।प। १०६, सू।मु। २।५३)