एक-श्लोकि-रामायणानि

आदौ राम-तपोवनादि-गमनं हत्वा मृगं काञ्चनं
वैदेही-हरणं जटायु-मरणं सुग्रीव-सम्भाषणम्।
वालेर् निर्दलनं समुद्र-तरणं लङ्का-पुरी-दाहनं
पश्चाद् रावण–कुम्भ-कर्ण–हननम् एतद् +धि रामायणम्॥१

आदौ रामतपोवनादिगमनं हत्वा मृगं काञ्चनं
वैदेहीहरणं जटायुमरणं सुग्रीवसम्भाषणम्।
वालेर्निर्दलनं समुद्रतरणं लङ्कापुरीदाहनं
पश्चाद्रावणकुम्भकर्णहननमेतद्धि रामायणम्॥१

तीर्त्वा मोहार्णवं हत्वा
राग-द्वेषादि-राक्षसान्।
योगी शान्ति-समायुक्त
आत्मारामो विराजते॥२

तीर्त्वा मोहार्णवं हत्वा रागद्वेषादिराक्षसान्।
योगी शान्तिसमायुक्त आत्मारामो विराजते॥२

देवान् सान्त्वयते, भुवि प्रभवते, शैवं धनुर् भञ्जते,
सीताम् उद्वहते, जनान् रमयते, पित्रे वनं गच्छते।
साधून् मोचयते, कपीन् सुखयते, लङ्केश्वरं संघ्नते,
भक्तान् नन्दयते, दशोद्यम-कृते रामाय तस्मै नमः॥३

देवान् सान्त्वयते भुवि प्रभवते शैवं धनुर्भञ्जते
सीतामुद्वहते जनान् रमयते पित्रे वनं गच्छते।
साधून्मोचयते कपीन् सुखयते लङ्केश्वरं संघ्नते
भक्तान्नन्दयते दशोद्यमकृते रामाय तस्मै नमः॥३

रामो दाशरथिर् जगाम विपिनं, सत्यं पितू रक्षयन्,
भार्याम् अस्य जहार राक्षसपती, रामेण चासौ हतः।
वृत्तं वस्तुत एदद् एव कविभिर् नाना-प्रबन्धैर् मुहुर्
विस्तारं गमितं तथा प्रगुणितं जातं च रामायणम्॥४

रामो दाशरथिर्जगाम विपिनं सत्यं पितू रक्षयन्
भार्यामस्य जहार राक्षसपती रामेण चासौ हतः।
वृत्तं वस्तुत एददेव कविभिर्नानाप्रबन्धैर्मुहु-
र्विस्तारं गमितं तथा प्रगुणितं जातं च रामायणम्॥४

प्रादुर्भावो मुरारेर् दश-रथ-सदने चाप-भङ्गो विवाहो
वैदेह्याश् चाऽप-हारो विजन-वन-तले वानराधीश-मैत्री।
वालेर् नाशः प्रदाहो दश-वदन-पुरः सेतु-बन्धः समुद्रे
रक्षो-ध्वंसश् च सङ्ख्ये, नृप-जनक-सुता-सङ्गमो राज्यलाभः॥६

प्रादुर्भावो मुरारेर्दशरथसदने चापभङ्गो विवाहो
वैदेह्याश्चापहारो विजनवनतले वानराधीशमैत्री।
वालेर्नाशः प्रदाहो दशवदनपुरः सेतुबन्धः समुद्रे
रक्षोध्वंसश्च सङ्ख्ये नृपजनकसुतासङ्गमो राज्यलाभः॥६

आदौ कोशल-धाम्नि मन्थर-मतिर् धर्म-च्युता मन्थरा
कैकेयी कपटोन्मुखा रघुपतिर् दत्ताटवीशासनः।
पौलस्त्येन हृता ततो जनक-जा, निद्रां गते स्वानुजे,
रक्षो-वंश-विमर्दनं च विहितं सूत्रेण ते शारदे॥५

+++(सरस्वतीस्तोत्रात् तस्य)+++

आदौ कोशलधाम्नि मन्थरमतिर् धर्मच्युता मन्थरा
कैकेयी कपटोन्मुखा रघुपतिर् दत्ताटवीशासनः।
पौलस्त्येन हृता ततो जनकजा निद्रां गते स्वानुजे
रक्षोवंशविमर्दनं च विहितं सूत्रेण ते शारदे॥५