चायं सुस्मितफेनभासरुचिरं सुप्तप्रबुद्धाय मे
स्वौष्ठस्पर्शमधु प्रपूर्णचषके दत्ते किलामोदवत्।
कच्चित्वत्प्रणयस्य पात्रमभवं ब्रूहीति पृष्टा मया
शस्त्रीकृत्य निजोपधानमबला मां ताडयत्युत्सुका ॥ १ ॥
दूरादागतमाननाङ्कितमुदा द्वार्येव संपृच्छति
क्लान्तः किम् सफलः श्रमः पिबसि किंचात्सीति मन्दस्मिता।
कच्चित्वत्प्रणयस्य पात्रमभवं ब्रूहीति पृष्टा मया
शस्त्रीकृत्य निजोपधानमबला मां ताडयत्युत्सुका ॥ २ ॥
व्याघातैर्बहुभिर्युते सफलतां कार्येऽहमाप्नोमि चेत्
मुञ्चत्याकुलतां प्रसह्य विजहत्यानन्दबाष्पं प्रिया ।
कच्चित्वत्प्रणयस्य पात्रमभवं ब्रूहीति पृष्टा मया
शस्त्रीकृत्य निजोपधानमबला मां ताडयत्युत्सुका ॥ ३ ॥
मातुर्गेहमहं व्रजामि कतिचिद्रात्रीरिति प्रस्थिता
आगत्यैव परेद्यवि त्वदशने चिन्तेति मां भाषते।
कच्चित्वत्प्रणयस्य पात्रमभवं ब्रूहीति पृष्टा मया
शस्त्रीकृत्य निजोपधानमबला मां ताडयत्युत्सुका ॥ ४ ॥