अथ राजारामजशङ्करकृतन् नृसिंहसुप्रभातम् हरिहरपुर-शारदापीठाय रचितम्।
आदिमश्लोकौ
करोति रविरुन्निद्रान् उदयाद्रिदरीहरीन् ।
उत्तिष्ठ नृहरे देव द्विरेफ+++(हरिहरशब्दे रेफौ)+++नगरीपते ॥१॥
पूषा पुरुषपारीन्द्र+++(=मृगेन्द्र)+++ स्फुटाम्भोरुहचिह्नया ।
भवानिव श्रिया भाति प्रभो प्राभातिकश्रिया ॥२॥
वसन्ततिलकाः
प्राची त्वदीयविकरालसटासमूह
स्वेच्छाविसृत्वरमरीचिविचित्रितेयम् ।
प्रीतिं परां प्रथयतु प्रगुणानुरागां
श्रीदक्षतीर्थनृहरे तव सुप्रभातम् ॥३॥
गर्भाद् गभस्तिभृद् असाव् उदयाचलस्य
स्तम्भस्य कस्यचन देव भवानिव प्राक् ।
निर्गत्य दैत्यमिव हन्ति निशान्धकारं
श्रीदक्षतीर्थनृहरे तव सुप्रभातम् ॥४॥
प्राप्ताः प्रसादम् असुरेन्द्रवधोत्कटस्य
प्रह्लादवीक्षणवशादिव दृष्टयस् ते ।
कृत्स्नां प्रभो कलुषतामपहाय काष्ठाः+++(दिशः)+++
श्रीदक्षतीर्थनृहरे तव सुप्रभातम् ॥५॥
अत्रेन्दुरस्तगिरिमूर्ध्नि विलम्बमानो
निस्तन्द्रसाधितनिशासमयाधिकारः ।
आप्रष्टुमिच्छति भवन्नखबन्धुवर्गं
श्रीदक्षतीर्थनृहरे तव सुप्रभातम् ॥६॥
पूर्वोत्थिता भगवती कलशाब्धि+++(=सागर)+++कन्या
दृष्टिं भवच्चरणपङ्कजयोर् निधत्ते ।
नीलोत्पलस्रजमिव प्रणयोपनीतां
श्रीदक्षतीर्थनृहरे तव सुप्रभातम् ॥७॥
सद्यो-विकस्वर-सरोरुह-सीधु+++(=मद्य)+++-सङ्गी
तुङ्गासमीर उपसर्पति मन्थरस्त्वाम् ।
पद्मामुखानिलसमानसुगन्धभूमा
श्रीदक्षतीर्थनृहरे तव सुप्रभातम् ॥८॥
पश्य त्वदायतन-हैम-गवाक्ष-मार्गाल्
लब्धप्रवेशम् अरुणांशुसहस्रम् अन्तः ।
पद्मं प्रबोधयति पार्श्वजुषो रमायाः
श्रीदक्षतीर्थनृहरे तव सुप्रभातम् ॥९॥
हार्याणि तस्य वृजिनानि+++(=पीडाः)+++, स रक्षणीयस्
तस्मै वरो वितरणीय इति क्षणेऽस्मिन् ।
सिंहावलोकनविधिं प्रकटीकुरुष्व
श्रीदक्षतीर्थनृहरे तव सुप्रभातम् ॥१०॥
तारास् तुषारकणिका, मृगलोचनानां
मानोद्धुरा विकृतयो - विलयं भजन्ते ।
चिन्ता इव त्वदनुभूतिसुखस्य जन्तोः
श्रीदक्षतीर्थनृहरे तव सुप्रभातम् ॥११॥
आसन्न-सारस-निवास-वधू-विपञ्ची-
निक्वाण-युक्ति-पुनरुक्तिकृतो निनादैः ।
पूजाप्रसूनमभितो भ्रमरा भ्रमन्ति
श्रीदक्षतीर्थनृहरे तव सुप्रभातम् ॥१२॥
शक्रश् चिराद् विनिहिताञ्जलिर् उत्तमाङ्गे
द्वाराश्रयी तमिह कालमुदीक्षते ऽसौ।
यत्र स्युरस्य फलवन्ति विलोचनानि
श्रीदक्षतीर्थनृहरे तव सुप्रभातम् ॥१३॥
रागोज्ज्वलैः प्रणवषट्चरणानुयातैस्
तत्त्वार्थसूत्रघटितैः प्रथयन्ति पूजाम् ।
अम्लानगानकुसुमैस् तव नारदाद्याः
श्रीदक्षतीर्थनृहरे तव सुप्रभातम् ॥ १४॥
संसारवारणविदारणदारुणस्य
तुङ्गा-तटी-विपिनसञ्चरणैक-चुञ्चोः +++(=दक्षस्य)+++।
सह्याङ्कवर्तिवर-शाङ्कर-शारदाम्बा-
पीठाह्वगह्वरहरे तव सुप्रभातम् ॥१५॥