०८

––––––

वामनजयन्ती

शेषः —

त्रेतायां श्रावणे मासि द्वादश्यां श्रवणे सिते ।
वामनोऽभूद्धरिः पक्षे क्षत्रविड्बलनाशनः॥

सिंहलग्ने सौम्यवारे धर्मसंस्थापनाय च ।
तन्मन्त्रेणार्चयेद्देवं यन्त्रकुम्भादिपूर्वकम् ॥

नारसिंहजयन्त्युक्तक्रमेणैव विचक्षणः ।
श्रीं बीजे वारुणं बीजं वामनाय नमस्तथा ॥

जपेन्मन्त्रमिमं सौम्यं सर्वसम्पत्प्रदायकम् ।
कुर्वीत तज्जयन्त्यां तु सहस्रं वा शतं तु वा ॥

यो जपेत्प्रत्यहं भक्त्यास तु राज्यं लभेत्सदा ।
ऋषिर्धाताऽस्य मन्त्रस्य छन्दोनुष्टुभ एव च ॥

देवता वामनः प्रोक्तः श्रीं बीजं शक्तिरीं तथा ।
तन्मन्त्रेण षडङ्गं तु कुर्यात्तत्तद्दिने तदा ॥

ध्यानम् —

कमण्डलुं यज्ञसूत्रं शिखां छत्रं च धारिणम् ।
तेजः पुञ्जमयं देवं वामनं पुरुषं भजे ॥

त्रिविक्रमजयन्ती

तद्युगे श्रावणे मासि द्वादश्यां श्रवणे तथा ।
तत्तिथौ सिंहलग्नान्ते आविरासीत्त्रिविविक्रमः॥

श्रीनृसिंहजयन्त्युक्तक्रमेणैव द्विजोत्तमः ।
कुर्यात्पूजादिकं सर्वं होमदानादिकं कमात्॥

त्रैविक्रमेण मन्त्रेण पूजाद्याः कुरु चाब्जज।
मायाबीजं समुद्धृत्य त्रीं त्रिविक्रमायेत्यपि॥

इदं रहस्यं परमं नमोन्तं सततं जपेत् ।
तज्जयन्त्यां सहस्रं तु जपेद्विप्रवरश्शुचिः॥

ऋषिःस्रष्टाऽस्य मन्त्रस्य त्रिष्टुप्छन्दः प्रजापते ।
त्रिविक्रमो देवता च ह्रीं बीजं शक्तिरींतथा ॥

लं कीलकं वं कवचं यमस्त्रं रक्तवर्णकम् ।
तन्मन्त्रेण षडङ्गं तु कुर्यान्मन्त्रप्रदस्तदा॥

ध्यानम् —

शङ्खचक्रधरं देवं विभुं तेजोमयं प्रभुम् ।
त्रिविक्रमं वासुदेवं भजे तं विश्वतोमुखम्॥

एतन्मन्त्रस्य माहात्म्यं वक्तुं श्रोतुं च दुर्लभम् ।
तस्मात्सर्वप्रयत्नेन देवर्षिब्राह्मणादयः॥

एतन्मन्त्रं जपेयुः वै जयन्तीं कुरु सर्वदा ।
तस्य मृत्युभयं नास्ति तस्य साध्यं जगत्त्रयम्॥

तस्य मुक्तिं प्रदास्यामि तस्य राज्यं ददाम्यहम् ।
सौदर्शनं नारसिंहं रामं कृष्णं त्रिविक्रमं॥

लक्ष्मीनारायणं सम्यगर्हाण्येव तदाऽब्जज।

इति श्रीपाश्चरात्रे शेषसंहितायामष्टमोऽध्यायः