आगमे वैष्णवे विश्वासटिप्पन्यः

विश्वास-प्रस्तुतिः

चतुष्पञ्चाशोऽध्यायः - 54
श्रीः—
चतुरश्रां समां पीतां वज्रचिह्नां वसुंधराम्।
मन्त्रेणाकृष्य देहान्तः स्वस्थाने च लयं नयेत् ॥ 1 ॥

मूलम्

विश्वास-प्रस्तुतिः

गन्धमात्रे ततस्तच्च स्वबीजेनास्तमानयेत्।
स्वबीजेन निवृत्तौ तां स्वमन्त्रेणास्तमानयेत् ॥ 2 ॥

मूलम्

विश्वास-प्रस्तुतिः

मय्यधिष्ठानभूतायां मां च बाह्येऽम्भसि क्षिपेत्।
मन्त्रेणार्धेन्दुसंकाशं पद्माङ्कं तच्च देहतः ॥ 3 ॥

मूलम्

विश्वास-प्रस्तुतिः

स्वस्थानस्थं लयं नीत्वा रसमात्रे स्वमन्त्रतः।
मन्त्रेण तत्प्रतिष्ठायां तच्च मय्यानयेल्लयम् ॥ 4 ॥

मूलम्

विश्वास-प्रस्तुतिः

मां च वह्निमनावृत्त्या प्रकृत्या च ततः क्रमात्।
सर्वत्र नैकं बुध्येत मच्छक्तेर्विलयं बुधः ॥ 5 ॥

मूलम्

विश्वास-प्रस्तुतिः

यथा हि सर्पिरासिञ्चेत् क्षीरे तन्मथनोद्भवम्।
सर्पिरन्यत्र च क्षीरे तत्सर्पिरपि चान्यकम् ॥ 6 ॥

मूलम्

विश्वास-प्रस्तुतिः

एवमा प्रकृतेः शक्तिमधिष्ठात्रीं स्मरेद् बुधः।
एवं मां परमां शक्तिं शक्तिसप्तकसंयुताम् ॥ 7 ॥

मूलम्

विश्वास-प्रस्तुतिः

द्वादशान्तान्तमुन्नीय मन्त्रमय्यां मयि क्षिपेत्।
अग्नीषोमार्ककोट्याभा सर्वतोऽक्षिशिरोमुखी ॥ 8 ॥

मूलम्

विश्वास-प्रस्तुतिः

सर्वजीवोपकाराय सा मे मन्त्रमयी तनुः।
शक्रः—
कानि स्थानानि देहेऽस्मिन् यत्र कार्यो लयः क्रमात् ॥ 9 ॥

मूलम्

विश्वास-प्रस्तुतिः

कीदृशानि च बिम्बानि भूरादीनां वदाम्बुजे।
श्रीः—
आ जानुतो भुवः स्थानमा कट्याः पयसः स्मृतम् ॥ 10 ॥

मूलम्

विश्वास-प्रस्तुतिः

आ नाभेस्तेजसः स्थानं वायोः स्थानं तदा हृदः।
आ कण्ठान्नभसः स्थानमा बिलाच्चाप्यहंकृतेः ॥ 11 ॥

मूलम्

विश्वास-प्रस्तुतिः

आ भ्रुवोर्महतः स्थानमाकाशे तु परं स्मृतम्।
चतुरश्रं भवेद्बिम्बं वज्राङ्कं पार्थिवं महत् ॥ 12 ॥

मूलम्

विश्वास-प्रस्तुतिः

अर्धेन्दुसदृशं शुक्लं पद्माङ्कं पयसः स्मृतम्।
त्रिकोणं स्वस्तिकाङ्कं च रक्तं तेजस उच्यते ॥ 13 ॥

मूलम्

विश्वास-प्रस्तुतिः

धूम्रं षड्‌बिन्दुसंयुक्तं वृत्तं वायव्यमुच्यते।
अञ्चनाभं तथाकाशं बिम्बमात्रं स्मृतं पदम् ॥ 14 ॥

मूलम्

विश्वास-प्रस्तुतिः

एवं तत्त्वोपसंहारे कृते हृत्कोटरोद्गतम्।
ज्ञानरज्ज्ववलम्बं च सुषुम्नामध्यमार्गगम् ॥ 15 ॥

मूलम्

विश्वास-प्रस्तुतिः

ऊर्ध्वमात्मन उन्नीय शक्तिसोपानपङ्‌क्तिभिः।
द्वादशान्तं महापद्ममध्यस्थायां मयि क्षिपेत् ॥ 16 ॥

मूलम्

विश्वास-प्रस्तुतिः

द्वादशान्तं महापद्मं सहस्रदलसंयुतम्।
सूर्यकोटिसहस्राभमिन्दुकोट्ययुतप्रभम् ॥ 17 ॥

मूलम्

विश्वास-प्रस्तुतिः

अग्नीषोमद्वयान्तःस्था महानन्दमयी तनुः।
अनिर्देश्योपमा संविन्माया सा मामिका तनुः ॥ 18 ॥

मूलम्

विश्वास-प्रस्तुतिः

अंशतः प्रसरन्त्यस्या जीवानन्दा सरिद्वरा।
स्वानन्दमेनमानीय महानन्दमयीं नयेत् ॥ 19 ॥

मूलम्

विश्वास-प्रस्तुतिः

ततो लवणकूटाभं पिण्डमस्मन्मुखोद्गतैः।
महाज्वालावलीजालैश्चिन्मयैः परितौ दहेत् ॥ 20 ॥

मूलम्

विश्वास-प्रस्तुतिः

रक्ततामरसः षष्ठो बिन्दुमान् देहपावकः।
सोममय्या ममास्योत्थैः पीयूषैः प्लावयेत्ततः ॥ 21 ॥

मूलम्

विश्वास-प्रस्तुतिः

सिसृक्षाया ममोद्यन्त्या संवित्प्र णोपगूढया।
प्रेरितास्ताः स्मरेच्छक्तीर्मन्त्रमय्यां तनौ स्थिताः ॥ 22 ॥

मूलम्

विश्वास-प्रस्तुतिः

तत्सताभिः स्वशक्तीभिश्चोदनद्वारपूर्वकम्।
प्रकृत्यादि विशेषान्तं निर्मितं संस्मरेत् क्रमात् ॥ 23 ॥

मूलम्

विश्वास-प्रस्तुतिः

ततः पिण्डसमुत्पत्तिं कारणव्यञ्जनोज्ज्वलम्।
एवं पिण्डं समुत्पाद्य शुद्धलक्ष्मीमयं महत् ॥ 24 ॥

मूलम्

विश्वास-प्रस्तुतिः

पूर्वोक्तगतिमार्गेण व्युत्क्रमेणानयेद्धृदि।
महानन्दात् स्वमात्मानं संविदानन्दलक्षणम् ॥ 25 ॥

मूलम्

विश्वास-प्रस्तुतिः

ततः करशरीरेषु मन्त्रन्यासं समाचरेत्।
अङ्गुष्ठादिकनिष्ठान्तमङ्‌गुलीस्थेषु पर्वसु ॥ 26 ॥

मूलम्

विश्वास-प्रस्तुतिः

तलयोः पृष्ठयोश्चैव करयोरुभयोरपि।
नाभितश्चाङ्‌घ्रिपर्यन्तं नाभेरा मूर्धतस्तथा ॥ 27 ॥

मूलम्

विश्वास-प्रस्तुतिः

न्यस्य संधिषु मद्बीजं हृदाद्यङ्गानि च न्यसेत्।
पुनर्हृदादिषट्‌केन नाभिपृष्टकरोरुषु ॥ 28 ॥

मूलम्

विश्वास-प्रस्तुतिः

जङ्घापदोश्च ज्ञानादि षाड्‌गुण्यं विन्यसेद् बुधः।
एवमुत्पादिते देहे शुद्धे लक्ष्मीमये शुभे।
आधारषट्‌कविन्यासं ज्ञानदृष्ट्या समाचरेत् ॥ 29 ॥

मूलम्

इति श्रीपाञ्चरात्रसारे लक्ष्मीतन्त्रोद्धारे तन्त्रार्थसंग्रहे चतुष्पञ्चाशोऽध्यायः ********इति चतुष्पञ्चाशोऽध्यायः********