७८

प्रणम्य भगवन्तं हि पर्यपृच्छत् पितामहः ।
को वा पञ्चशतं स्नानं ब्रूहि मे परमेश्वर ! ॥ १ ॥

ईश्वरः ॥

तत् सर्वमखिलं वक्ष्ये श्रूयतां चतुरानन ! ।
प्रासादस्याग्रतः कुर्यान् मण्डपं चतुरश्रकम् ॥ २ ॥

वितानोपरि सं * * दर्भमालोपशोभितम् ।
चतुस्तोरण संयुक्तं दर्भमालोपशोभितम् ॥ ३ ॥

अष्टमङ्गलसंयुक्तं दिग्ध्वजैश्च प्रलम्बितम् ।
मुक्तादामैरलङ्कृत्य मण्डपं मण्डयेत् ततः ॥ ४ ॥

गोमयालेपनं कृत्वा सूत्रपातं तु कारयेत् ।
त्रिंशत् सूत्र समायुक्तं प्रागग्राणि विन्यसेत् ॥ ५ ॥

उदगग्रं तथैव स्याद् विन्यसेद् देशिकोत्तमः ।
मध्ये नवपदं पद्मम् अष्टपत्रं सकर्णिकम् ॥ ६ ॥

प्। ३६४)

द्वारार्थं च चतुर्दिक्षु पदमेकं तु ह्रासयेत् ।
तद्बाह्ये तु परितः पदं पञ्च स्थितानि तु ॥ ७ ॥

एवमेव प्रकारेण कर्तव्यं लक्षणान्वितम् ।
शालिना विकिरेत् तत्र आढकं कलशं प्रति ॥ ८ ॥

शाल्यर्धं तण्डुलं न्यस्य तण्डुलार्धं तिलं न्यसेत् ।
पद्ममष्टदलं लिख्य दर्भैश्चैव परिस्तरेत् ॥ ९ ॥

त्रिगुणीकृतसूत्रेण वेष्टयेत् कुञ्जराक्षवत् ।
शुद्धोदकेन सम्पूर्य कुम्भमादाय मण्डपे ॥ १० ॥

प्रासादेन तु मन्त्रेण स्थापयेच्छिवकुम्भकम् ।
वर्धनीं तस्य वामे तु गौरीबीजेन स्थापयेत् ॥ ११ ॥

वस्त्रयुग्मेन संवेष्ट्य वेष्टयेद् द्विगुणोपरि ।
कूर्चं तत्रैव निक्षिप्य नवरत्नानि विन्यसेत् ॥ १२ ॥

वर्धन्यां पञ्चरत्नं तु विन्यसेद् देशिकोत्तमः ।
शिवकुम्भे शिवं स्थाप्य वर्धन्यां च मनोन्मनीम् ॥ १३ ॥

अभितः कलशानष्टौ विद्येश्वर समन्वितम् ।
वस्त्रयुग्मेन संवेष्ट्य स्वर्णं तत्रैव विन्यसेत् ॥ १४ ॥

प्रथमावरणे ह्येवं द्वितीयावरणं शृणु ।
द्वितीयावरणे चैव षट्सप्तति च विन्यसेत् ॥ १५ ॥

पञ्चमावरणं चैव चत्वार्यधिकमेव च ।
अशीतिकलशं चैव विन्यसेद् देशिकोत्तमः ॥ १६ ॥

प्। ३६५)

षष्ठावरणके चैव कलशान् विन्यसेद् बुधः ।
तृतीयावरणे चैव अष्टाविंशति विन्यसेत् ॥ १७ ॥

चतुर्थावरणे चैव नवतिं द्व्यधिकं तथा ।
सप्तमावरणे चैव शतकुम्भांश्च विन्यसेत् ॥ १८ ॥

अष्टोत्तरशतं चैव अष्टमावरणे न्यसेत् ।
कूर्चान् कलश संयुक्तान् शुद्धोदकेन पूरितान् ॥ १९ ॥

शाल्योपरि न्यसेत् कुम्भान् हृदयेन तु मन्त्रतः ।
उत्कूर्चं पौष्टिकं चाहुरधः कूर्चं तु शान्तिकम् ॥ २० ॥

अतः कृत्वा तु सर्वेषाम् आभिचारिकमुच्यते ।
एलालवङ्गतक्कोल निम्बुजाती फलैर्युतम् ॥ २१ ॥

उशीरं चन्दनं चैव प्रथमावरणे न्यसेत् ।
गोमूत्रं गोमयं चैव दधिक्षीरं घृतं तथा ॥ २२ ॥

रोचनं चर्करं चैवमधुना च समन्वितम् ।
सर्षपं मुद्गमाषं च प्रियङ्गुं च समन्वितम् ॥ २३ ॥

द्वितीयावरणे न्यस्य देवतानां शृणुष्वथ ।
अजः कापालि बुद्धी च वज्रदेहः प्रमर्दनः ॥ २४ ॥

विभूतिरव्ययः शास्ता पिनाकी त्रिदशाधिपः ।
अग्नीरुद्रो हुताशश्च द्वितीयावरणे न्यसेत् ॥ २५ ॥

कर्पूरं गिरिबेरं च तृणकच्चोलजम्बुकम् ।
तृतीयावरणे न्यस्य देवतानां शृणुष्वथ ॥ २६ ॥

प्। ३६६)

ज्वलनो दहनो बभ्रुः भस्मान्तक क्षयान्तकौ ।
आग्नेयादिषु कोणेषु क्रमाद्विन्यस्य देवताः ॥ २७ ॥

धाता पूर्वा च तक्कोलं पुन्नागं जातिपाटली ।
चतुर्थावरणे न्यस्य देवतानां शृणुष्वथ ॥ २८ ॥

कालरुद्रश्च विख्यात धर्माधर्म परिस्तथा ।
संयोक्ता च समायुक्तं पञ्चमावरणे न्यसेत् ॥ २९ ॥

पञ्चासनं तु सङ्कल्प्य स्नापयेच्छिवकुम्भकम् ।
व्योमव्यापिं जपेत् तत्र ब्रह्माङ्गैश्च समन्वितम् ॥ ३० ॥

वर्धन्यां गौरिबीजेन विन्यसेत् पीठके ततः ।
यथा स्थापितमार्गेण स्नापयेत् कलशांस्ततः ॥ ३१ ॥

पञ्चवर्णहविर्दद्यात् ताम्बूलं दापयेत् ततः ।
आचार्यदक्षिणां दद्यात् पञ्चाङ्गभूषणैस्सह ॥ ३२ ॥

स्नपनोपकरणं सर्वमाचार्याय प्रदापयेत् ।
एवं यः कुरुते मर्त्यः शिवलोकमवाप्नुयात् ॥ ३३ ॥

पञ्चशतस्नपनं प्रोक्तं पञ्चाशद् द्विशतं शृणु ।

इति वीरतन्त्रे पञ्चशतस्नपनविधिः अष्टसप्ततितमः पटलः ॥ ७८ ॥