अथ कृत्तिकादीपविधि-पटलः
अथातः सम्प्रवक्ष्यामि कृत्तिकादीपलक्षणम् ।
कार्तिके कृत्तिकामासे दीपकर्मसमाचरेत् ॥ १८-१ ॥
देवालयमलङ्कृत्वा दीपसाधन सङ्ग्रहम् ।
स्नपनन्तत्र कुर्वीत यजमानेच्छयान्वितम् ॥ १८-२ ॥
प्रासादाग्रस्य परितच्छाष्टदिक्षुविशेषतः ।
कूटागाराणि कृत्वा तु चतुर्गात्रान्वितानि वै ॥ १८-३ ॥
कूटबन्धेषु सर्वत्र मृदं विन्यस्य तत्र वै ।
दीपानिविन्यसेत् तेषु दीपस्तं भांस्तु विन्यसेत् ॥ १८-४ ॥
खदिरन्नालिकेरं वा पात्रमानं प्रकीर्तितम् ।
घृतं पात्रे समानीय शोधितं तैलमेव वा ॥ १८-५ ॥
कार्पासबीजसंयुक्तं वाससच्छिन्नसंयुतम् ।
घृतमध्येसु विन्यस्य स्तम्भमूर्ध्निसुदीपयेत् ॥ १८-६ ॥
प्रासादमिह सर्वत्र दीपमाल्यैरलङ्करोत् ।
क्षुद्रनास्यां महानास्यां कुम्भे चैव कपोतके ॥ १८-७ ॥
पालिका सुगुहा स्वत्र दीपयन्त्रैः सुदीपयेत् ।
प्रासादमूर्ध्नि देशेषु मण्डपेगोपुरे तथा ॥ १८-८ ॥
प्राकारेषु विशेषेण दीपं सर्वत्र योजयेत् ।
स्तम्भेषु घटिका योज्यास्तेषु दीपसमावृतम् ॥ १८-९ ॥
अघोरास्त्रेण मन्त्रेण दीपदण्डेधिरोपयेत् ।
उत्तमं कूटदीपं स्यान्मध्यमं स्तम्भदीपकम् ॥ १८-१० ॥
दीपं बाहुल्या मात्रं यदधमं परिचक्षते ।
भवानीं कारयेत् पश्चात् देवदेवं त्रिशूलिनम् ॥ १८-११ ॥
उत्सवं वा प्रकर्तव्यमेकाहं विधिवत् सुधीः ।
केवले भवने नैव बल्यादि क्रममाचरेत् ॥ १८-१२ ॥
ग्रामं वा नगरादिं वा आलयं वा प्रदक्षिणम् ।
दीपेन भूषयित्वा तु भक्तियुक्तानरोत्तमाः ॥ १८-१३ ॥
ईदृग्गुण विशेषाढ्यं ग्रामं कृत्वा प्रदक्षिणम् ।
आलयं सम्प्रविश्याथ परिवेषक्रमञ्चरेत् ॥ १८-१४ ॥
प्रभूतहविषङ्कृत्वा देवदेवस्य भक्तितः ।
स्तुत्यैरध्ययनैर्भक्तैर्वाद्यै नृत्तादिकैरपि ॥ १८-१५ ॥
परितोष्य च देवेशं क्रियां सम्यक् समाचरेत् ।
कृत्तिका दीपमत्रोक्तं पूरकर्म ततः शृणु ॥ १८-१६ ॥
इति कृत्तिकादिपविधि पटलोष्टादशः ॥ १८ ॥