चक्रदानस्थापनपटलप्रारम्भः
अथातस्सम्प्रवक्ष्यामि सर्वभूतहिताय च
चक्रदानस्वरूपन्तु श्रुणुष्व शरवणोद्भव ॥ १ ॥
त्रिणेत्रं चतुर्भुजं शान्तं जटामकुटमण्डितम्
वामपादन्तु शयनं लम्बितं सव्यपादकम् ॥ २ ॥
टङ्कं रथाङ्गं सव्ये च वरदं कृष्णमृगन्तथा
वामे विष्णुसमायुक्तं कृताञ्जलिपुटान्वितम् ॥ ३ ॥
वामे गौरी समायुक्तम् उत्तरे परमेष्ठिनम्
सर्वावयवसंयुक्तं सर्वलक्षणसंयुतम् ॥ ४ ॥
पद्मपुष्पं समभ्यर्च्य हरिणा नेत्रपूजितम्
प्रभामण्डलमद्ध्यस्थं शिरश्चक्रसमायुतम् ॥ ५ ॥
एवं कल्प्यविशेषेण प्रतिष्ठां श्रुणु षण्मुख
पूर्ववद्यागशालाञ्च वेदिकां पूर्ववच्चरेत् ॥ ६ ॥
अङ्कुरं पूर्वमेवोक्तं वास्तुपूजान्ततः परम्
नयनोन्मीलनं कृत्वा चरेत् ग्रामप्रदक्षिणम् ॥ ७ ॥
शयनारोपणं विद्यात् मण्टपाराधनं पुरा
वेदिका मद्ध्यमे चैव दशकुम्भं प्रकीर्तितम् ॥ ८ ॥
आसनं मूर्तिमभ्यर्च्य अञ्जलीकरसंयुतम्
प्रणवं पूर्वमुच्चार्य वरहरमृम् इति क्रमात् ॥ ९ ॥
शिवाय नम इत्येते आवाह्य पूजयेत्ततः
पञ्चावरणमार्गेण पूजयित्वा यथाविधि ॥ १० ॥
पूर्वोक्तविधिमार्गेण वह्निकार्यं समाचरेत्
अन्तर्बहिर्बलिञ्चैव सायम्प्रातर्हुनेत्ततः ॥ ११ ॥
प्रायश्चित्ताहुतिञ्चैव पूर्णाहुतिं समाचरेत्
घटे संयोजयेत्पश्चात्सुमुहूर्ते सुलग्नके ॥ १२ ॥
अभिषेकञ्चरेच्चैव हविर्दत्वा निवेदयेत् ॥ १३ ॥
ब्राह्मणान्भोजयेत्तत्र आचार्यं पूजयेत्ततः
एवं यः कुरुते मर्त्यस्सपुण्याङ्गतिमाप्नुयात् ॥ १४ ॥
इति चक्रदानस्थापनपटल एकाशीतितमः