२२ नवग्रहप्रकाशः

श्रीदेव्युवाच ॥

सूर्य्यमन्त्राः श्रुता देव तदंशानां खचारिणाम् ॥
श्रोतुमिच्छामि च मनून्सप्रयोगांश्च तान्वद ॥ १ ॥

श्रीशिव उवाच ॥

साधुपृष्टं त्वया देवि त्रैलोक्यस्योपकारकम् ॥
कालेन कथितं मह्यं तन्मया कीर्त्यतेधुना ॥ २ ॥

मायया मम रूपं च ब्रह्मविष्णुमहेश्वराः ॥
तत्त्वतो नैव जानन्ति किम्पुनः शक्तितो जनाः ॥ ३ ॥

अप्रत्यक्षं महाविष्णोस्तद्ब्रह्माह्वयमुच्यते ॥
तथा मम ग्रहा रूपं तव मायेति कीर्त्तितम् ॥ ४ ॥

ग्रहास्तुष्टास्तदा देवा भूपालाश्चाखिलं जगत् ॥
तुष्टं भवति रुष्टेषु शत्रुत्वमुपजायते ॥ ५ ॥

कदाचिद्ब्रह्मलिखितं मिथ्या दैवाद्भविष्यति ॥
न तु ग्रहकृतं दुःखं सौख्यं मिथ्याप्रजायते ॥ ६ ॥

सौमित्येकाक्षरं बीजं चन्द्रस्य परिकीर्त्तितम् ॥
पङ्क्तिश्छन्दो देवता च चन्द्रमा भार्गवो मुनिः ॥
सदीर्घनिजबीजेन ¹ षडङ्गानि समाचरेत् ॥ ७ ॥

श्वेताब्जसंस्थं रजतकान्तिहारविराजितम् ॥
नीलकेशं च कुमुदं वामे दक्षकरे वरम् ॥
दधानं भावयेदेवं मृगाङ्कं मणिमौलिकम् ॥ ८ ॥

पीठे धर्म्मादिसंयुक्ते गगनं परिपूज्य च ॥
चन्द्रमण्डलपर्य्यन्तं ततः सम्पूजयेद्विधुम् ॥ ९ ॥

राज्ञी कुमुद्वती भद्रा सुधा सञ्जीविनी क्षमा ॥
आप्यायिनी चन्द्रिका च ह्लादिनी नव शक्तयः ॥ १० ॥

पूर्वादिक्रमतो मन्त्री मध्यान्ताः पूजयेदिमाः ॥
अमृता तारका ज्योत्स्ना विमला व्यापिनी तथा ॥
चित्रा च कृत्तिका कान्तिः श्रवणा पीठशक्तयः ॥ ११ ॥

अमृतान्ते कलात्मने संवित्पीठाय वै नमः ॥
अनेन पीठं सम्पूज्य नाममन्त्रैश्च शक्तयः ॥ १२ ॥

किञ्जल्केषु षडङ्गानि तच्छक्तीः पत्रगा यजेत् ॥
रोहिणी कृत्तिका चैव रेवती भरणी तथा ॥
रात्रिरार्द्रा तथा ज्योत्स्ना कला ध्यानमथोच्यते ॥ १३ ॥

सुसिताः श्वेतवसनाः श्वेतमाल्यानुलेपनाः ॥
मुक्ताहारालङ्कृताङ्ग्यः पाण्यञ्जलिपुटाः शुभाः ॥ १४ ॥

आपीनोन्नतवक्षोजहाराक्रान्तावलग्नकाः ॥
मन्दं मदनगामिन्यः प्राणनाथाक्तमानसाः ॥
प्रसन्नचन्द्रवदनाः फुल्लेन्दीवरलोचनाः ॥ १५ ॥

ग्रहानष्टौ कलाग्रेषु लोकेशाश्च ततो यजेत् ॥
वज्रादीनि ततो बाह्येप्येवं पूजा समीरिता ॥ १६ ॥

वर्णलक्षं जपेन्मन्त्रं जुहुयात्तत्सहस्रकम् ॥
हविषा घृतसिक्तेन तर्प्पणादि ततश्चरेत् ॥
ततः सिद्धो भवेन्मन्त्रः प्रयोगानाचरेत्ततः ॥ १७ ॥

चन्द्रं शिरसि सञ्चिन्त्य जपेन्मन्त्रमनन्यधीः ॥
त्रिसहस्रं तेन लभते राज्यैश्वर्य्यमकिञ्चनः ॥ १८ ॥

लघुमिष्टहविस्याशी जलस्थो विजितेन्द्रियः ॥
वेदलक्षमितं मन्त्रं प्रजपेद्यतमानसः ॥
धरागतं निधानं स ध्रुवं प्राप्नोति तत्क्षणात् ॥ १९ ॥

घोरे ज्वरे महाक्लेशे शिरोरोगे च दारुणे ॥
शत्रूत्पादितकृत्यासु कामलाद्यामयेषुच ॥
अयुतं प्रजपेन्मन्त्रं यच्छान्तिरचिराद्भवेत् ॥ २० ॥

पूर्णियां जपेन्मत्रं यथाशक्ति जितेन्द्रियः ॥
सौभाग्यारोग्यसम्पत्तिभाजनं मनुजो भवेत् ॥ २१ ॥

मैत्रवारुणविस्तीर्णमण्डलानां त्रयं बुधः ॥
लिप्ते भूमण्डले कृत्वा निषीदेत्पश्चिमे ततः ॥ २२ ॥

मध्यस्थे मण्डले न्यस्य पूजोपकरणानि च ॥
अग्रस्थमण्डले पद्मसंयुते पूर्ववद्यजेत् ॥ २३ ॥

विधुं ततो रौप्यजातं पात्रं संस्थाप्य पूरयेत् ॥
शुद्धगोपयसा मन्त्री स्पृशन्पात्रं मनुं जपेत् ॥ २४ ॥

अष्टाधिकशतं पश्चाद्राकायामुदये विधोः ॥
चन्द्राय विद्यामनुना ² दद्यादर्घं यथाविधि ॥
कान्तिं यथेप्सितां कन्यां सत्कीर्तिं लभते ध्रुवस् ॥ २५ ॥

विद्ये विद्यामालिनीयुक् चन्द्रिन्यन्ते च चन्द्रयुक् ॥
मुखि शिरोन्तस्ताराद्यो विद्यामनुरयं स्मृतः ॥ २६ ॥

वंसंवमिति चन्द्रस्य त्र्यर्णो मन्त्रोस्य देवता ॥
सोमः श्रीश्छन्द उद्दिष्टमेकतत्त्वो मुनिर्मतः ॥ २७ ॥

आकारः शक्तिरुद्दिष्टो रुं बीजं परिकीर्त्तितम् ॥
बीजेनैव षडङ्गानि ध्यानपूजादिपूर्ववत् ॥ २८ ॥

चन्द्रस्य मण्डलास्यान्तु ह्युकारं पुटितं स्मरेत् ॥
अमृतं निस्सृतं तेन प्लावितं सकलं वपुः ॥ २९ ॥

एवं भावनया तोयं मन्त्रयेत्तिथिवारकम् ॥
समस्तविषरोगाद्यकालमृत्युविनाशनम् ॥ ३० ॥

इत्थं सूर्य्योदयात्पूर्वं जलपानं तु यश्चरेत् ॥
पापक्षयायुर्वृद्धी च वलीपलितनाशनम् ॥ ३१ ॥

ॐश्रींश्रींश्रूं सबिन्दुः स सो सोमायेत्यग्निगेहिनी ॥
दशाक्षरश्चन्द्रमन्त्रो जप्यश्चाग्रे दयायुतैः ॥ ३२ ॥

होमादिकप्रयोगांश्च सर्वं पूर्ववदाचरेत् ॥
एते प्रोक्ताश्चन्द्रमन्त्रा सर्वकल्याणदायकाः ॥ ३३ ॥

अथ भौममनुं वक्ष्ये सर्वरोगनिवारणम् ॥
अं च अङ्गारको ङेन्तो हृदन्तश्चाष्टवर्णकः ॥ ३४ ॥

ऋष्याद्या ब्रह्मगायत्रीभूमिपुत्राः ³ प्रकीर्त्तिताः ॥
अङ्गषट्कन्त्वस्य मनोरादि ⁴ बीजेन सम्मतम् ॥ ३५ ॥

नमाम्यङ्गारकं रक्तं रक्ताम्बरविभूषणम् ॥
जानुस्थवामहस्ताढ्यम्भाजनेतरपाणिकम् ॥ ३६ ॥

लक्षाष्टको जपः प्रोक्तः खादिरैरिन्धनैर्हुनेत् ॥ ३७ ॥

साज्यैस्सन्तर्प्पणं रक्तचन्दनाद्यैः समाचरेत् ॥
एवं कृते प्रयोगस्य समरे न पराजयः ॥
अनुग्रहात्तस्य लोकस्त्वनृणी व्याधिविच्युतः ॥ ३८ ॥

ॐश्रीङ्क्लीं मनुमुच्चार्य्य ङेन्तो भौमो हृदन्तकः ॥
दशाक्षरो मनुः प्रोक्तो विरूपाक्षो मुनिर्मतः ॥ ३९ ॥

गायत्री छन्द उद्दिष्टं देवता मङ्गलो भवेत् ॥
ह्रीम्बीजं श्रीश्च शक्तिः स्यात्कीलकं क्लीं प्रकीर्त्तितम् ॥ ४० ॥

कालादिकं समुच्चार्य्य नियोगो ऋणनाशने ॥
षड्दीर्घयुक्तबीजेन अङ्गुल्यादिषडङ्गकम् ॥ ४१ ॥

ब्रह्मरन्ध्रे कर्णयोश्च अक्ष्णोर्नासिकयोर्मुखे ॥
लिङ्गे गुदे च मन्त्रस्य दशवर्णान्क्रमान्न्यसेत् ॥ ४२ ॥

मङ्गलो भूमिपुत्रश्च ऋणहर्त्ता धनप्रदः ॥
स्थिरासनो महाकायः सर्वकर्म्मावरोधकः ॥ ४३ ॥

लोहितो लोहिताक्षश्च सामगानां कृपाकरः ॥
धरात्मजः कुजो भौमो भूमिदो भूमिनन्दनः ॥ ४४ ॥

अङ्गारको यमश्चैव सर्वरोगापहारकः ॥
वृष्टिकर्त्तापहर्ता च सर्वकर्म्मफलप्रदः ॥ ४५ ॥

शिखायां मूर्ध्नि भाले च नेत्रयोः कर्णयोर्नसोः ॥
मुखे च चिबुके कण्ठे स्कन्धयोर्भुजयोस्तथा ॥ ४६ ॥

पाण्योर्हृद्युदरे नाभौ कट्यां लिङ्गे स्फिचोस्तथा ॥
जान्वोश्च जङ्घयोरङ्घ्र्योः क्रमान्नामानि विन्यसेत् ॥ ४७ ॥

चतुर्थ्यन्न्तहृदन्तानि संविद्यादक्षराणि च ॥
ततो ध्यायेद्रक्तवर्णं रक्तमाल्यांशुकावृतम् ॥ ४८ ॥

कण्ठे कमलमालाढ्यङ्करयोः शक्तिशूलके ॥
मङ्गलानां मङ्गलञ्च सर्वकामफलप्रदम् ॥ ४९ ॥

एवन्ध्यात्वा जपेल्लक्षं जुहुयात्करवीरजैः ॥
जपाप्रसूनैः पुरुभिर्मधुरत्रितयान्वितैः ॥ ५० ॥

रक्तचन्दनगन्धाद्यैर्यजेदरुणभूषणम् ॥
विधिना भूमितनयं सर्वाम्भीष्टफलप्रदम् ॥ ५१ ॥

अङ्गान्यभ्यर्च्य पूर्वन्तु मङ्गलाद्यांस्ततोर्चयेत् ॥
एकविंशतिकोष्ठेषु ततो चाष्टौ ग्रहान्न्यसेत् ॥ ५२ ॥

भैरव्यष्टकमर्च्यन्तु ब्राह्मी नारायणी तथा ॥
माहेश्वरी च चामुण्डा कौमारी चापराजिता ॥ ५३ ॥

वाराही नारसिंही च ततोष्टौ भैरवा अपि ॥
पूज्या विधानतः सर्वे मन्त्रिणैभिर्मनूत्तमैः ॥ ५४ ॥

असितागं रुरुं चण्डं क्रोधमुन्मत्तसञ्ज्ञकम् ॥
कपालिनं भीषणं च तथा संहारभैरवम् ॥ ५५ ॥

इन्द्रादिलोकपालांश्च तद्बाह्ये चायुधानि च ॥
पूजयेद्भैरवानेतान्क्रमात्पूर्वोक्तवर्त्मना ॥
एवं सिद्धमनुर्मन्त्री प्रयोगान्कर्तुमर्हति ॥ ५६ ॥

पूजोत्तरं भौमवारेङ्गारकेण त्रिरेखिकाम् ॥
स्वागतो वामपादेन प्रव्रज्याष्टोत्तरं शतम् ॥ ५७ ॥

जपेद्दशांशं होमस्य तर्प्पणं पयसा चरेत् ॥
ब्राह्मणं भोजयेदेकं गुडप्रचुरवस्तुभिः ॥ ५८ ॥

स्तुत्वा नत्वार्चयेद्देवं साधकः स्थिरमानसः ॥
अनेन क्रमयोगेन निहत्य ऋणमादरात् ॥
लभते महतीं लक्ष्मीं वत्सरेण न संशयः ॥ ५९ ॥

विशेषान्मङ्गले वारे देवमेनं समर्चयेत् ॥
जुहुयात्तर्प्पयेन्मन्त्री प्राप्नुयान्निजवाञ्छितम् ॥ ६० ॥

त्रिकोणं पूर्वमुद्धृत्य पञ्चधा विभजेत्ततः ॥
ततस्तृतीयरेख्हन्तु चिह्नाभ्यां लाञ्छयेत्ततः ॥ ६१ ॥

आद्यरेखां तु युगलं तृतीयाञ्चिह्नयोर्न्यसेत् ॥
द्वितीयाग्रे समाकृष्य तृतीयाञ्चिह्नयोर्न्यसेत् ॥ ६२ ॥

युता रेखा तृतीया तु समभाज्या समन्ततः ॥
तुर्य्या चिह्नद्वयेनाथ त्रिभिश्चिह्नैश्च पञ्चमी ॥ ६३ ॥

तृतीयाग्रे प्रकुर्वीत पञ्चम्या मध्यचिह्नजे ॥
तुर्य्याग्रे योजयेत्सम्यक्पञ्चम्याश्चिह्नयोर्द्वयोः ॥ ६४ ॥

अथ मीनद्वये दद्यात्सूत्रयुग्मं विचक्षणः ॥
एवमेकाधिका सम्यक्कोष्ठानां विंशतिर्भवेत् ॥ ६५ ॥

तृतीयातूर्य्ययोर्मध्ये स्थितं वह्निगृहेर्चयेत् ॥
देवं तदग्रतो मन्त्री त्रिकोणे दक्षिणे क्रमात् ॥
मङ्गलाद्यांस्तारपूर्वान्नमोन्तानेकविंशतिम् ॥ ६६ ॥

भौमभक्तस्यैकविंशत्पौरुषी नास्ति निस्स्वता ॥
अथ मन्त्रान्तरंवक्ष्ये भामजस्य महाद्भुतम् ॥ ६७ ॥

तारं मायां रमां म्लां च मं मङ्गलपदं वहेत् ॥
ङेन्तं हृदन्तं रुद्रार्णैः प्रोक्तो भौमप्रियो मनुः ॥ ६८ ॥

प्राग्वत्पूजादिकं सर्वं चावाहनमनुस्त्वयम् ॥
भगवन्देवदेवेश एह्येहि त्वम्महाप्रभो ॥ ६९ ॥

ऐश्वर्य्यं वशमायातु भूतलेषु समाश्रितम् ॥
एकविंशतिभिः पुष्पैरक्तैः प्रत्येकमर्चयेत् ॥
रक्तगन्धादिवस्त्रैश्च नैवेद्यं च गुडोदनम् ॥ ७० ॥

कृत्वा तु त्रिगुणं भूमावे कविंशतिरोटिकाः ॥
गोधूमचूर्णजास्तत्र स्थापयित्वा प्रभक्षयेत् ॥ ७१ ॥

सगुडाः प्रत्यहं जप्यमष्टोत्तरसहस्रकम् ॥
भौमस्तोत्रपुराणादिचर्चया तु दिनं नयेत् ॥ ७२ ॥

एकविंशद्दिनं प्रोक्तं यस्य कस्यापि चाग्रतः ॥
याचनीयं योग्यवस्तु सत्वरञ्च प्रयच्छति ॥ ७३ ॥

अथ मन्त्रान्तरं वक्ष्ये भूमिपुत्रस्य सिद्धिदम् ॥
ॐहांहंसः खङ्ख इति मन्त्रः प्रोक्तः षडक्षरः ॥ ७४ ॥

मुनिर्विरूपो गायत्री छन्दो देवो धरात्मजः ॥
षड्भिर्वर्णैः षडङ्गानि मनोः कुर्वीत साधकः ॥ ७५ ॥

जपाकुसुमसङ्काशं शक्तिशूलगदाधरम् ॥
मेषसंस्थं रक्तवस्त्रं तं वन्देहं धरात्मजम् ॥ ७६ ॥

रसलक्षं जपेद्धोमः समिद्भिः खदिरस्य च ॥
शैवपीठे यजेद्भौमं प्रागङ्गानि तु पूजयेत् ॥ ७७ ॥

एकविंशतिकोष्ठेषु मङ्गलादीन्प्रपूजयेत् ॥
तद्बहिः ककुभां नाथान्कुलिशादींस्ततोर्चयेत् ॥
इत्थं सुसिद्धं मन्त्रेशं स्वेष्टसिद्ध्यै प्रयोजयेत् ॥ ७८ ॥

नारी पुत्रमभीप्सन्ती मङ्गलव्रतमाचरेत् ॥
मार्गशीर्षेथ वैशाखे तस्यारम्भः प्रशस्यते ॥
लभते नात्र सन्देहः पुत्रं सर्वगुणान्वितम् ॥ ७९ ॥

अरुणोदयवेलायामुत्थाय शुचिविग्रहा ॥
दन्तान्धावेद्द्वेदमार्गसमिधा मौनसेविता ॥ ८० ॥

नद्यादिसलिले स्नात्वा धारयेद्रक्तवाससी ॥
नैवेद्यकुसुमालेपादिकान्सम्पाद्य संयता ॥
विधिज्ञं विप्रमाहूय भौममर्चेत्तदाज्ञया ॥ ८१ ॥

रक्तगोगोमयालिप्तदेशे पीठं निवेशयेत् ॥
मङ्गलादीनि नामानि स्वप्रतीकेषु विन्यसेत् ॥ ८२ ॥

अङ्घ्र्योश्च जानुनोरूर्वोः कटौ गुह्ये तथोरसि ॥
वामबाहौ दक्षबाहौ गले च वदने नसोः ॥ ८३ ॥

अक्ष्णोर्भाले भ्रुवोर्मध्ये केशिखायां ⁵ कलेवरे ॥
बाहुद्वयेथ मूर्द्धादिपादपर्य्यन्तविग्रहे ॥ ८४ ॥

पादतो मूर्द्धपर्य्यन्तं तथा दिक्षु प्रविन्यसेत् ॥
आरं वक्रं भूभिजं च नाभौ वक्षसि मूर्द्धनि ॥
एवं न्यस्तशरीरोसौ ध्यायेद्धरणिनन्दनम् ॥ ८५ ॥

अर्घ्यं संस्थाप्य विधिवत्पूजयेदुपचारकैः ॥
एकविंशतिकोष्ठाढ्ये त्रिकोणे ताम्रपात्रके ॥ ८६ ॥

आवाह्य धरणीपुत्रं स्वर्णपुष्पैश्च चन्दनैः ॥
अङ्गानि पूजयेत्प्राग्वदेकविंशतिकोष्ठतः ॥ ८७ ॥

मङ्गलदींस्त्रिकोणेषु वक्रमरं च भूमिजम् ॥
ब्राह्म्याद्या मातृका बाह्ये शक्रादीनायुधान्यपि ॥ ८८ ॥

धूपदीपौ निधायाथ गोधूमान्नं निवेदयेत् ॥
जलपूर्णे ताम्रपात्रे धूपदीपाक्षतान्विते ॥
फलं निधाय मन्त्राभ्यां भौमायार्घ्यं निवेदयेत् ॥ ८९ ॥

भूमिपुत्र महातेजः स्वेदोद्भव पिनाकिनः ॥
सुतार्थिनी त्वां प्रपन्ना गृहाणार्घ्यं नमोस्तु ते ॥ ९० ॥

एकविंशतिकृत्वोथ प्रणमेत्पूर्वनामभिः ॥
प्रदक्षिणा विधातव्या तावद्भिर्नगपात्मजे ॥ ९१ ॥

खादिराङ्गारकेणाथ कुर्य्याद्रेखात्रयं समम् ॥
वामपादेन मन्त्राभ्यामेताभ्यां तत्प्रमार्जयेत् ॥ ९२ ॥

दुःखदौर्भाग्यनाशाय पुत्रसन्तानहेतवे ॥
कृतरेखात्रयं वामपादेनैव प्रमार्ज्म्यहम् ॥ ९३ ॥

ऋणदुःखविनाशाय मनोभीष्टार्थसिद्धये ॥
मार्जयाम्यसिता रेखास्तिस्रो जन्मत्रयोद्भवाः ॥ ९४ ॥

ततः पुष्पाञ्जलिं कृत्वा स्तुवीत धरणीसुतम् ॥
ध्यायन्ती चरणाम्भोजं पूजासाङ्गत्वसिद्धये ॥ ९५ ॥

धरणीगर्भसम्भूतं विद्युत्तेजःसमप्रभम् ॥
कुमारं शक्तिहस्तं च मङ्गलं प्रणमाम्यहम् ॥ ९६ ॥

ऋणहन्त्रे नमस्तुभ्यं दुःखदारिद्र्यनाशिने ॥
नमो विद्योतमानाय सर्वकल्याणकारिणे ॥ ९७ ॥

देवदानवगन्धर्वयक्षराक्षसपन्नगाः ॥
सुखं यान्ति यतस्तस्मै नमो धरणिसूनवे ॥ ९८ ॥

यो वक्रगतिमापन्नो नृणां दुःखं प्रयच्छति ॥
पूजितः सुखसौभाग्ये तस्मै क्ष्मासूनवे नमः ॥ ९९ ॥

प्रसादं कुरु मे नाथ मङ्गलप्रद मङ्गल ॥
मेषवाहन रुद्रात्मन्पुत्रं देहि धनं यशः ॥ १०० ॥

एवं सम्पूज्य सम्भूय गृह्णीयाद्ब्राह्मणाशिषः ॥
गुरवे दक्षिणान्दत्त्वा भुञ्जीतान्नं निवेदितम् ॥ १०१ ॥

प्रतिभौमदिनं कुर्य्यादेवं संवत्सरावधि ॥
तिलैर्विधाय होमं च शतार्धं भोजयेद्द्विजान् ॥ १०२ ॥

माहेयमूर्त्तिं ⁶ सौवर्णीमाचार्य्याय निवेदयेत् ॥
मण्डलस्थे घटेभ्यर्च्य सुतसौभाग्यसिद्धये ॥ १०३ ॥

अङ्गारकाय विद्महे शक्तिहस्ताय धीमहि ॥
तन्नो भौमः प्रचोदयात् ॥ १०४ ॥

एषाङ्गारकगायत्री जपिताभीष्टदायिनी ॥
एतस्यास्तु जपादेव प्रसीदति धरासुतः ॥ १०५ ॥

ॐक्राङ्क्रीङ्क्रौं सबिन्दुः सकुजायेत्यग्निगेहिनी ॥
दशाक्षरो भौममन्त्रो जप्यश्चायं नवायुतम् ॥ १०६ ॥

अथातः सम्प्रवक्ष्यामि बुधमन्त्रं महाद्भुतम् ॥
बुं ङेन्तो बुधशब्दश्च हृदयान्तः षडर्णकः ॥ १०७ ॥

बुधमन्त्रोस्य मुन्याद्या ब्रह्मपङ्क्तिबुधा मताः ॥
षडङ्गानि स्वबीजेन विन्यस्यैवं विचिन्तयेत् ॥ १०८ ॥

वन्दे बुधं सदा देवं पीताम्बरसुभूषणम् ॥
जानुस्थवामहस्ताब्जं साभयेतरपाणिकम् ॥ १०९ ॥

प्रजपेद्वर्णसाहस्रं दशांशं जुहुयाद्घृतैः ॥
अर्चनं त्वङ्गखेटाशापतिभिस्त्र्यावृतं स्मृतम् ॥ ११० ॥

ॐब्राम्ब्रीम्ब्रूं सबिन्दुः स बुधायेत्यग्निगेहिनी ॥
दशाक्षरः सौम्यमन्त्रो जपो लक्षैकसङ्ख्यया ॥ १११ ॥

ॐजाञ्जीञ्जूं सबिन्दुः स चतुर्थ्यन्तो बृहस्पतिः ॥
वह्निस्त्रीविश्ववर्णोयं जप्यः पञ्चदशायुतम् ॥ ११२ ॥

अथातः सम्प्रवक्ष्यामि गुरुमन्त्रं गुरुत्वकृत् ॥
बृं बृहस्पतये हृच्च मन्त्रश्चाष्टाक्षरो मतः ॥
छन्दोनुष्टुम्मुनिर्ब्रह्मा देवः प्रोक्तो बृहस्पतिः ॥ ११३ ॥

बृम्बीजं तेन कुर्वीत बीजेनैवाङ्गकल्पनम् ॥
सुवर्णाभं पीतवस्त्रं रत्नस्वर्णाम्बरादिकम् ॥ ११४ ॥

किरन्तं दक्षहस्तेन रत्नादीन्वामपाणिना ॥
स्पृशन्तं सम्यगपरं वृषणौ कनकादिकम् ॥ ११५ ॥

नानालङ्कारशोभाढ्यं विद्यासागरपारगम् ॥
जपित्वाशीतिसाहस्रं हुत्वा तेन घृतेन वा ॥ ११६ ॥

धर्म्मी धर्मादिपीठे तं पूजयेदङ्गदिक्सुरैः ॥
सिद्धे मनौ प्रकुर्वीत प्रयोगानिष्टसिद्धये ॥ ११७ ॥

हरिद्राकुङ्कुमैर्हुत्वा घृताक्तैर्दिवसत्रयम् ॥
सप्तविंशच्छतान्मन्त्री वासांसि लभते मणीन् ॥ ११८ ॥

शत्रुरोगादिपीडासु कलहे स्वजनोद्भवे ॥
जुहुयात्पिप्पलोत्थाभिस्समिद्भिस्तन्निवृत्तये ॥ ११९ ॥

गुरोरुपासकानां तु जायन्ते सर्वसम्पदः ॥
वस्त्रं ⁷ मे देहि शुक्राय हृदयान्तः शुमादिकः ॥ १२० ॥

एकादशाक्षरो मन्त्रो विराट् छन्द उदाहृतम् ॥
ब्रह्मा मुनिर्देवता तु शुक्रो दैत्यातिपूजितः ॥ १२१ ॥

षड्भिः ⁸ पदैः षडङ्गानि ततो देवं विचिन्तयेत् ॥
शुक्रं नमाम्यासनस्थं मुक्ताभरणभूषितम् ॥ १२२ ॥

स्वर्णवासोरत्नधाराचिन्मुद्रात्तकरद्वयम् ॥
अयुतं प्रजपेमन्त्रं सहस्रं जुहुयाद्घृतैः ॥
अङ्गग्रहाशेशहेतिचतुरावरणं ⁹ मनोः ॥ १२३ ॥

शुक्रस्यो पासको यस्तु तस्य म्लेच्छादयो वशाः ॥
भवन्ति मन्त्रमाहात्म्यान्नश्यन्ते च क्ष यादयः ॥ १२४ ॥

मन्त्रान्तरं तु ताराद्यं स्वाहान्तं स्याद्भवार्णकः ॥
बीजं तारोग्निभार्य्या तु शक्तिर्मुन्यादि पूर्ववत् ॥
अङ्गेन्द्राद्यायुधैः पूजा त्रिरावृत्यास्य कीर्त्तिता ॥ १२५ ॥

सुगन्धैः श्वेतकुसुमैर्जुहुयाच्छुक्रवासरे ॥
एकविंशतिवारान्यो लभते सांशुकं मणिम् ॥

एतन्मन्त्रोपासकाना प्रभुत्वमुपजायते ॥ १२६ ॥

ॐ ह्रां ¹⁰ ह्रीं ह्रौं सबिन्दुस्सशुक्रायेत्यग्निगेहिनी ॥
दशाक्षरः शुक्रमन्त्रो जप्योयं द्वादशायुतम् ॥ १२७ ॥

उदुम्बरसमिद्भिश्च जुहुयात्सकलापदः ॥
भूपैः कृता विनश्यन्ति स्त्रीसौख्यमुपजायते ॥ १२८ ॥

शनैश्चराय ¹¹ हृदयं समाद्यश्चाष्टवर्णकः ॥
मुन्याद्या ¹² ब्रह्मगायत्रीशनैश्चरसमाह्वयाः ॥
षड्दीर्घयुक्तबीजेन षडङ्गानि समाचरेत् ॥ १२९ ॥

वन्दे शनैश्चरं वक्रदंष्ट्रं नीलविभूषणम् ॥
वामजानुस्थितं वामकरं दक्षे वरं दधत् ॥ १३० ॥

जपेदक्षरसाहस्रं तद्दशांशं हुनेद्धृतैः ॥
षडङ्गग्रहदिक्पालसायुधैः परिपूजनम् ॥
शनैश्चरस्य भक्तानामापदो न दरिद्रता ॥ १३१ ॥

ॐप्राम्प्रीम्प्रौम्स इत्युक्त्वा शनैश्चरपदं वदेत् ॥
ङेन्तं स्वाहा द्वादशार्णो जपः प्रयुतसम्मितः ॥ १३२ ॥

हुनेच्छमीसमिद्भिश्च क्लीबाः सर्वेस्य वश्यगाः ॥
क्लीबानत्रानयेत्युक्तं साधकोस्य प्रभावतः ॥ १३३ ॥

अपरं तु मनुं वक्ष्ये राहवे नम उच्चरेत् ॥
एम्पूर्वकः षडर्णोयं वर्णैरेवाङ्गकल्पनम् ॥
मुन्याद्या ब्रह्मगायत्रीराहवः परिकीर्त्तिताः ॥ १३४ ॥

वन्दे राहुं धूम्रवर्णं सर्पकार्यं कृताँजलिम् ॥
विकृतास्यं रक्तनेत्रं धूम्रालङ्कारमन्वहम् ॥ १३५ ॥

जपेद्वर्णसहस्रं तु होमयेद्गोघृतेन च ॥
ग्रहाशाधिपशस्त्रैश्च पूजावृत्तिरुदीरिता ॥
राहोरुपासको भूपः सङ्ग्रामे विजयी भवेत् ॥ १३६ ॥

ॐसांसींसौं सबिन्दुः सराहवे चाग्निगेहिनी ॥
दशाक्षरो राहुमन्त्रो जप्यश्चायं दशायुतम् ॥ १३७ ॥

दूर्वाभिर्होमयित्वा च द्विजान्सन्तर्प्य सिद्ध्यति ॥
यात्रासिद्धिश्च सङ्ग्रामे नियतं विजयो भवेत् ॥
कं केतवे हृदित्येवं केतुमन्त्रः षडर्णकः ॥ १३८ ॥

ब्रह्मामुनिर्मतश्छन्दः पङ्क्तिः केतुश्च देवता ॥
कं बीजं केतुशक्तिश्च बीजेनैव षडङ्गकम् ॥ १३९ ॥

वन्दे केतुं कृष्णवर्णं कृष्णवस्त्रविभूषितम् ॥
वामोरुन्यस्तसद्धस्तं साभयेतरपाणिकम् ॥ १४० ॥

अङ्गैर्ग्रहैश्च दिक्पालैः पूजावृत्तित्रयात्मिका ॥
अत्र तु ग्रहपूजायां पूज्यं मध्ये निवेशयेत् ॥ १४१ ॥

तदग्रिमं चोत्तरस्यामीशानादि तदग्रतः ॥
ॐ प्राम्प्रीम्प्रौं सबिन्दुः सकेतवे वह्निगेहिनी ॥ १४२ ॥

दशाक्षरः केतुमन्त्रो जप्तोयं द्वादशायुतम् ॥ १४३ ॥

होमः कुशैः प्रकर्त्तव्यो घृताक्तैस्तर्प्पणादि च ॥
उपासकानामेतस्य केतवोग्रे चलन्ति हि ॥ १४४ ॥

अथातः सम्प्रवक्ष्यामि ग्रहमातृसुसाधनम् ॥
ग्रहमातरि तुष्टायां किं ग्रहैर्दुस्स्थितैरपि ॥
ग्रहमातरि रुष्टायां सुग्रहैः किं प्रयोजनम् ॥ १४५ ॥

मङ्गला पिङ्गला धान्या भ्रामरी भद्रिका तथा ॥
उल्का सिद्धा सङ्कटा च विकटागर्भपालिका ॥ १४६ ॥

रुद्रनेत्रान्विताश्चाष्टौ जन्मर्क्षाच्च क्रमाद्दशाः ॥
फलं नामनि रूपं स्यादेकोपचयता द्वयोः ॥ १४७ ॥

पिङ्गला सूर्य्यजननी महाधिव्याधिकारिका ॥
तुष्टा चेच्छत्रुवर्गस्य रुष्टा कुर्य्यात्तु साधके ॥ १४८ ॥

क्षें बीजन्तु समुच्चार्य्य पिङ्गले वैरिवारणि ॥
प्रसीद फडिति प्रोच्याणुस्त्रयोदशवर्णकः ॥
दीर्घषट्कयुजा ¹³ पूर्वबीजेनैव षडङ्गकम् ॥ १४९ ॥

पिङ्गवर्णां पिङ्गकेशीं पिङ्गनेत्रां धनुः शरान् ॥
हस्ताभ्यां दधतीं पद्मयुगलं तां भजाम्यहम् ॥ १५० ॥

अथ पूजाविधिं वक्ष्ये सर्वासामेव तन्त्रतः ॥
जपापुष्पाणि शस्तानि धूपो गुग्गुलसम्भवः ॥ १५१ ॥

घृतप्रदीपोमधुरा नैवेद्याः पायसादयः ॥
अलङ्कारस्तथा रक्तास्तथा वस्त्राणि चन्दनम् ॥ १५२ ॥

स्वर्णालङ्करणैश्चापि सद्रव्यैर्बहुचम्पकैः ॥
तर्प्पयेत्परमेशानीं तत्तन्मन्त्रैः सहस्रधा ॥ १५३ ॥

सुवर्णपात्रे निश्छिद्रे हस्तायामे मनोरमे ॥
कृत्वा यन्त्रं यथोक्तन्तु योगिनीं तत्र पूजयेत् ॥ १५४ ॥

तत्तन्मन्त्रं जपित्वा तु विघ्नशान्त्यै सहस्रशः ॥
सप्ताहेन प्रजायेत त्रिविधोत्पातवारणम् ॥ १५५ ॥

ततश्च कुण्डं विधिवत्कृत्वा च चतुरस्रकम् ॥
अथ वा स्थण्डिले शुद्धे सुलिप्ते गोमयाम्बुभिः ॥ १५६ ॥

चतुर्हस्तप्रमाणेन योजयेत्स्थिरमानसः ॥
योगिन्यग्निन्तु संस्थाप्य कृत्वा पूर्वोदिताः क्रियाः ॥
अन्यासां दशवारांस्तु विरुद्धायाः सहस्रधा ॥ १५७ ॥

बिल्वपत्रैस्तत्फलैश्च कमलैर्नागकेशरैः जुहुयात्पायसान्नेन तथैव कुलवस्तुना ॥
सहस्रमयुतं वापि लक्षं वा कामनाक्रमात् ॥ १५८ ॥

अथ पूजां प्रवक्ष्यामि मध्ये देवीं प्रपूजयेत् ॥
इच्छां ज्ञानं क्रियाशक्तिं त्रिषु कोणेषु पूजयेत् ॥ १५९ ॥

मन्मथान्पञ्च तदधः पञ्चकोणेषु पूजयेत् ॥
षडङ्गं पूजयेत्पश्चादष्टपत्रेन्ययोगिनीः ॥
तद्बाह्ये भूपुरे लोकपालानस्त्राणि पूजयेत् ॥ १६० ॥

पूजाप्रकारो होमश्च सर्वासामयमेव हि ॥
विशेषः पुनरत्रास्ति शत्रूच्छेदाभिचारकैः ॥ १६१ ॥

खड्गचर्मधरामुग्रां ध्यायेत्षड्भुजधारिणीम् ॥
गरुडासनमासीनां वैरिनिग्रहकरिणीम् ॥ १६२ ॥

लक्षमेकं प्रजप्यादौ जपेल्लक्षं हि तर्प्पयेत् ॥
सर्वशत्रुविनाशः स्याद्दुःखं नाप्नोति कुत्रचित् ॥ १६३ ॥

अथातः सम्प्रवक्ष्यामि चन्द्रमातुश्च साधनम् ॥
मायाद्यो ¹⁴ वह्निजायान्तो मङ्गले मङ्गलालये ॥ १६४ ॥

एकादशाक्षरो मन्त्रो मङ्लायाः प्रकीर्तितः ॥
कृत्वाद्येन षडङ्गानि दीर्घषट्कयुजा तथा ॥ १६५ ॥

ध्यायेदेनां त्रिनयनामुद्यदादित्यसन्निभाम् ॥
दरस्मेरमुखाम्भोजां सिन्दूरसुन्दराधराम् ॥ १६६ ॥

पद्मद्वये धनुर्बाणान्दधतीं भुजपल्लवैः ॥
सुगुञ्जन्मञ्जुमञ्जीरां काञ्चीगुणविराजिताम् ॥ १६७ ॥

एवं ध्यात्वा महेशानीं पूर्ववत्परिपूजयेत् ॥
ततो लक्षं मनुं जप्त्वा तारमायापुरःसरम् ॥ १६८ ॥

योगिनीक्षेत्रबटुकगणाधिपबलिं हरेत् ॥
सर्वासामेव पूजान्ते मङ्गलैवं प्रसीदति ॥ १६९ ॥

योगिन्यास्तु प्रसादार्थं वर्णलक्षं मनुं जपेत् ॥
दुर्योगिन्यनुकूलार्थं जपेत्तत्सङ्ख्यकायुतम् ॥ १७० ॥

अदृष्टप्रतिबद्धस्तु शुभायाश्च फलस्य च ॥
प्राप्तये प्रजपेत्तावत्सहस्रन्तु मनुं सुधीः ॥ १७१ ॥

प्रकर्तव्यो ¹⁵ वर्णशतं यावत्तुष्टास्ति योगिनी ॥
तुष्टाया वर्णशतकै रोगिणं चाभिमन्त्रयेत् ॥ १७२ ॥

वर्णतुल्येन मन्त्रेण यस्याः सेवापरो भवेत् ॥
तस्याः पीडानि वृत्तिः स्याद्वर्णाभ्यन्तर्गतैर्जपैः ॥ १७३ ॥

एवंविधिर्नवानां तु विज्ञेयः सुरसत्त माः ॥
योगिनी तुल्यफलदा वामे मार्गे च दक्षिणे ॥ १७४ ॥

अथातः सम्प्रवक्ष्यामि भ्रामरीं भौममातरम् ॥
क्षीं भ्रामरीपदं चोक्त्वा सपत्नान्मे अधीश्वरि ॥
भ्रामय क्लीं षड्दशार्णो मन्त्रोस्याः परिकीर्तितः ॥ १७५ ॥

पिङ्गलावत्सर्वमस्याः सिद्धये शर्करा दश ॥
मन्त्रयित्वा तथा मार्गे दशदिक्षु च सन्त्यजेत् ॥ १७६ ॥

प्रातस्ततो व्रजेन्मार्गं मार्गस्थास्सर्व एव हि ॥
सर्वे मोहं समायान्ति व्याघ्राः सर्प्पाश्चतस्कराः ॥
शुल्किनो दुष्टभूपाश्च नित्यमेवं समाचरेत् ॥ १७७ ॥

उपानत्कतले यस्य लिखित्वा नाम च व्रजेत् ॥

योजनैकं जपन्मन्त्रं स भ्रमेच्च वसुन्धराम् ॥ १७८ ॥

अथातः सम्प्रवक्ष्यामि भद्रिकां बुधमातरम् ॥
ब्लं बीजं तोयभृयोगाज्जातमादौ समुच्चरेत् ॥ १७९ ॥

भद्रिके मे मम भद्रं देहीत्येवं पदं वदेत् ॥
पुनश्च परभद्राणि नाशयद्वितयं ततः ॥ १८० ॥

स्वाहान्तो जिन वर्णोयं भद्रिकाया मनुर्मतः ॥
षड्दीर्घयुक्तबीजेन ¹⁶ षडङ्गविधिरीरितः ॥ १८१ ॥

मङ्गलावच्छुभानां स्याद्ध्यानन्तु फलदायिनाम् ॥
पिङ्गलावत्समुद्दिष्टं जपाद्यं प्रोक्तवर्त्मना ॥ १८२ ॥

अथातः सम्प्रवक्ष्यामि धान्याख्यां गुरुमातरम् ॥
श्रीं ¹⁷ धनदे समुच्चार्य्य धान्ये स्वाहाष्टवर्णकः ॥ १८३ ॥

षड्दीर्घाढ्याद्यबीजेन षडङ्गविधिरीरितः ॥
नास्ति धान्यासमाकाचिदिह लोके धनप्रदा ॥ १८४ ॥

पुरश्चर्य्यात्रयं कृत्वा प्राग्जन्मार्ज्जितपातकम् ॥
दहेत्तु धान्या ददते धन्यत्वं साधकाय च ॥ १८५ ॥

बृहस्पतीश्वरात्पश्चात्काश्यां धान्यां विलोकयेत् ॥
पुरश्चर्य्यां तत्र कृत्वा यशोधन्यः प्रजायते ॥ १८६ ॥

अथातः सम्प्रवक्ष्यामि सिद्धां शुक्रस्य मातरम् ॥
ह्रीं ¹⁸ सिद्धिदे सर्वं मम समुक्त्वा साधयद्वयम् ॥ १८७ ॥

हृदन्तोयं षोडशार्णः सिद्धः सिद्धामनुर्मतः ॥
बीजेनैव षडङ्गानि जपाद्यं पूर्ववच्चरेत् ॥
नास्ति सिद्धोपासकानां कर्म्मासिद्धिस्तु कुत्रचित् ॥ १८८ ॥

उपासकाय सिद्धाय येनाम्नायेन जायते ॥
तेनाम्नायेन देवानां पाके स्यात्सर्वमेव हि ॥
सिध्येत् षट्कर्म्म मर्त्यस्य मनोराराधनं विना ॥ १८९ ॥

अथातः सम्प्रवक्ष्यामि चोल्कां मन्दस्य मातरम् ॥
ऐं ह्रीमुल्कापदं ¹⁹ पश्चाद्देव्यै हृच्चाष्टवर्णकः ॥
मन्त्रः प्रोक्तः प्रजप्तोयं धनारोग्यप्रदो मतः ॥ १९० ॥

ॐ मम सर्वरोगान्नाशय भञ्जयैकादशाक्षरः ॥
सर्वरोगापहो मन्त्रो मार्जनात्सम्प्रपद्यते ॥ १९१ ॥

उल्कामन्त्रो यस्य सिद्धो न गदास्तस्य मन्दिरे ॥
शीतलाया महामार्या महिषं लक्षणान्वितम् ॥ १९२ ॥

उल्काप्रीत्यै समुत्सृज्य नगरे भ्रामयेत्पुनः ॥
नानावाद्यैः परिवृतं वस्त्रादिभिरलङ्कृतम् ॥
उत्सृजेत्तं यमाशायामुपद्रवशमो भवेत् ॥ १९३ ॥

अथातः सम्प्रवक्ष्यामि सङ्कटां राहुमातरम् ॥
ह्रीं सङ्कटे च रोगं मे परमं नाशयद्वयम् ॥ १९४ ॥

षोडशार्णस्तु मन्त्रोयं सर्वदुःखापहो मतः ॥
कारागृहे जपेल्लक्षं बन्धमोक्षः प्रजायते ॥ १९५ ॥

वीरे श्वरादुदक्काश्यां सङ्कटा यत्र संस्थिता ॥
तत्र षोडशलक्षाणि जप्त्वा होमस्तु दूर्वया ॥ १९६ ॥

तस्य सिद्धो भवेन्मन्त्रस्तन्मुखाद्यदि निस्सरेत् ॥
अमुकस्यामुकं कष्टं गतं तद्गतमेव हि ॥ १९७ ॥

अथातः सम्प्रवक्ष्यामि विकटां केतु मातरम् ॥
तारो ²⁰ नमो भगवति विकटे वीरपालिके ॥ १९८ ॥

प्रसीदयुगलं मन्त्रः प्रकृत्त्यर्णः प्रकीर्त्तितः ॥
काश्यां वीरेश्वरासन्ना पश्चिमे विकटा स्थिता ॥ १९९ ॥

तत्र मन्त्रमिमं जप्त्वा ग्रहतप्ताश्च बालकाः ॥
उदरं चापि बन्ध्यायाः प्रजावत्यास्तथा शिरः ॥ २०० ॥

पित्रादित्यक्तबालाश्च तथा मातृविवर्ज्जिताः ॥
साधकस्य करस्पृष्टा नीरोगाश्चिर जीविनः ॥ २०१ ॥

इति श्रीमहामायामहाकालानुमते मेरुतन्त्रे शिवप्रणीते नवग्रहप्रकाशो द्वाविंशः ॥ २२ ॥