815 ज्ञानम्

विशिष्टाद्वैतसिद्धान्ते नारायणकटाक्षतः।विनश्यत्यखिलं कर्माविद्यानिग्रहलक्षणम्॥

वेदनं ध्यानविश्रान्तं ध्यानं श्रान्तं ध्रुवास्मृतौ।सा च दृष्टित्वमभ्येति दृष्टिः भक्तित्वमृच्छति॥

शतदू.[7 भ.]

स्मृतिसन्ततिधारेयं ध्यानमित्यभिधीयते।विजातीयप्रत्ययाव्यवहीता सा ध्रुवा स्मृतिः॥

तैलादिधारावदविच्छिन्ना सन्ततिरेव सा।सा दर्शनसमाकारा दृष्टिरित्यभिधीयते॥

वैशद्यातिशयश्चैषः भवेदाकारशब्दितः।एवंरीत्युपचारस्य निदानं स्यादिदं यथा॥

शास्त्रैकसमधागम्यं ब्रह्मौपनिषदं मतम्।अतश्च शास्त्रयोनीति संरम्भेण निरूपितम्॥

तदन्तःकरणाध्यक्षवेद्यत्वे हि विरुध्यते।भावनाबलजाध्यक्षवेद्यत्वेऽपि तथैव हि॥

अतः प्रत्यक्षशब्दस्स्यात्समानाकारगोचरः।वृक्षेवक्षे च पश्यामीत्यादिभूरिप्रयोगतः॥