623 वैशेषिकाक्षेपः

शाक्या वैशेषिकाश्चापि पृथक् शब्दस्य मानताम्। नाङ्गीकुर्वन्ति तैरुक्तं वचनं चेदमुच्यते॥

प्रत्यक्षमनुमानं च प्रमाणे सदृशात्मनः। अप्रत्यक्षस्य संबन्धात् अन्यतः प्रतिपत्तिः॥

न्या. र.[410]

अपोद्धृताभिधायी च शब्दः वस्तु न संस्पृशेत्। अपोहवाचोयुक्त्या च शून्यता सैव सम्मता॥

न्या. र.[562]

प्रशस्तपादभाष्यानुवादोऽप्येष निशम्यताम्। वक्तृप्रामाण्यसापेक्षः श्रुतिस्मृत्यादिलक्षणः॥

आम्नायोऽप्यनुमानं तद्वचनादिति सूत्रणात्। वक्तृज्ञानानुमानेन प्रामाण्यं तस्य सम्मतम्॥