611 न्यायमतम्

अर्थापत्तेस्तु नैवेह प्रमाणान्तरतेष्यते। व्यतिरेकव्याप्तिबुद्ध्या चरितार्था हि सा यतः॥

सत्त्वभोजनयोर्व्याप्ये स्यातां जीवनपीनते। जीवत्वे च गृहासत्त्वं बहिस्सत्त्वं प्रसाधयेत्॥

पीनत्वे त दिवाऽभुक्तिः रात्रिभोजनसाधनम्। इति नैयायिकाः प्राहुः इतरेऽपि तदध्वगाः॥

अनियम्यस्य नायुक्तिः नानियन्तोपपादकः। न मानयोर्विरोधोऽस्ति प्रसिद्धे चाप्यसौ समः ॥

न्या. कु.[3 स्त.]

इदमौदयनं पद्यं तस्य चार्थोऽयमुच्यते । व्याप्यमेवोपपाद्यं स्यात् व्यापकश्चोपपादकः ॥

विरोधे नैव मानं स्यात् अनुमानेऽपि सा भवेत् । विस्तरो न्यायकुसुमाञ्जल्यादौ वीक्ष्यतां बुधैः ॥