522 नियमानुपपत्तिः

अथानुमानप्रमाणविकल्पः महती कथा। तथाऽपि शक्यसंक्षेपा स्यादित्यत्र प्रयत्यते॥

विशेषेऽनुगमाभावः सामान्ये सिद्धसाधनम्। अनुमाभङ्गपङ्केऽस्मिन् निमग्ना वादिदन्तिनः॥

स. सि.[4-41]

विशेषेऽनुगमाभावात्सामान्ये सिद्धसाधनात्। तद्वतोऽनुपपन्नत्वादनुमानकथा कुतः॥

व्याप्तिरेवानुमानस्य जीवातुस्सा च सर्वथा। न संभवति संबन्धग्रहस्यानुपपत्तितः॥

अन्वयव्यतिरेकाभ्यां नाविनाभावनिश्चयः। त्रैकालिनां वस्तूनामानन्त्यादतिशङ्कनात्॥

अतएवेहानुमानशब्दः प्रायेण लौकिकैः। प्रयुज्यते संशयार्थः परोक्षं संशयात्मकम्॥

साहचर्ये च संबन्धे विस्त्रम्भ इति मुग्धता। शतकृत्वोऽपि तद्दृष्टौ व्यभिचारस्य संभवात्॥

देशकालदशाभेदविचित्रात्मसु वस्तूषु। अविनाभावनियमः न संभवति कुत्रचित्॥