328 काम्यपक्षः

वेदेन सकलं कर्म काम्यमेवोपदिश्यते। इत्येतत् भर्तृनित्रादेः मतमित्यूहितुं क्षमम्॥

यतस्ते नोपगच्छन्ति फलं नित्यनिषिद्धयोः। इति कौमारिलाः प्राहुरित्यूचे पार्थसारथिः॥

न्या. र.[4]

निषिद्धस्य फलाभावे न त्याज्यमितिचेन्न तत्। द्विजातिकर्मणो हानिः परत्रासिद्धिरित्यपि॥

गौ. ध.[21-4]

तमेते नरकं प्राहुरिति गौतमसूत्रणम्। नरकं स्यान्यक्करणं नीचैर्गमनमेव वा॥

नास्यास्मिन् रमणं वेति निरुक्तं यास्कसूरिणा। इति गौतमशास्त्रस्य भाष्ये मस्करिणोदितम्॥

विहितस्याननुष्ठानान्निन्दितस्य च सेवनात्। अनिग्रहाच्चेन्द्रियाणां नरः पतनमृच्छति॥

याज्ञ.[3-219]

हिंसास्तेयानृताब्रह्मचर्यग्रहणभेदतः। निषिद्धं कर्म सकलं संजग्राह पतञ्जलिः॥

यत् शौचसंतोषतपस्स्वाध्यायेश्वरसेवनम्। विहितस्य च सर्वस्य पञ्चधा संग्रहो ह्ययम्॥