08 समाधानम्

क्षेप्तुं वादानेवमादीन् दृश्यते किल वार्तिके । सिद्धे शब्दार्थसम्बन्ध इति वाररुचं वचः ॥

वररुचि.[1-1-1]

शब्दे चार्थे च सम्बन्धे नित्य एवेति तद्वचः । व्याख्यातं भाष्यकारेण पतञ्जलिमहर्षिणा ॥

औत्पत्तिकस्तु शब्दस्यार्थेन सम्बन्ध इत्यपि । जैमिनिस्सूत्रयामास शब्दार्थान्वयनित्यताम् ॥

जै. सू.[1-1-5]

नित्याश्शब्दार्थसम्बन्धाः समाम्नाता महर्षिभिः । सूत्राणां सानुतन्त्राणां भाष्याणां च प्रणेतृभिः ॥

वा. प.[1-23]

इति वाक्यपदीयेऽपि प्राह भर्तृहरिस्स्वयम् । यश्शब्दाद्वैतसिद्धान्तप्रतिष्ठापनदेशिकः ॥