अथ वक्ष्ये संग्रहतो
द्वादशगुणिताख्यमद्य यन्त्रवरम्।
संपूज्य येन शक्तिं
भुक्तेर्मुक्तेर्व्रजेन्नरोऽनुभवम् ॥ १०.१ ॥
व्याहृत्यावीतशक्तिज्वलनपुरयुगद्वन्द्वसंध्युत्थशक्त्या
वीतं कोणात्तदुर्बीजकमनु च कपोलात्तगायत्रिमन्त्रम्।
आग्नेयावीतमर्णैर्वृतमनुविगतैर्भूपुराभ्यां च रन्ध्रे
क्ष्त्रौंचिन्तारत्नकं द्वादशगुणितमिदं यन्त्रमिष्टार्थदायि ॥ १०.२ ॥
पूर्वोक्तमानक्लृप्त्या
मन्त्री त्रितयं विलिख्य वृत्तानाम्।
विलिखेदन्तर्वर्तुल
मनु शक्तिं स्पष्टबिन्दुनिष्ठानाम् ॥ १०.३ ॥
द्वादशमध्यमवर्तुल
रेखा बहिरालिखेच्च शक्तीनाम्।
हरियमवरुणधनाधिप
दिक्षु द्वे द्वे च ताः क्रमेण स्युः ॥ १०.४ ॥
ईशाग्निनिऋतिमरुतां
दिक्ष्वेकैकं विलिख्य भूयश्च।
बीजान्तरालनिर्गत
शूलाङ्कितकोणषट्कयुगमग्नेः ॥ १०.५ ॥
मण्डलयुगयुगलं स्या
दस्पृशदान्तरितवर्तुलं विशदम्।
शक्तिं प्रवेष्टयेच्च
प्रतिलोमव्याहृतीभिरन्तःस्थाम् ॥ १०.६ ॥
रविकोणेषु दुरन्तां
मायां विलिखेदथाग्रबिन्दुमतीम्।
एकैकान्तरितास्ताः
परस्परं शक्तयश्च संबध्युः ॥ १०.७ ॥
गायत्रीं प्रतिलोमतः प्रविलिखेदग्नेः कपोलं बहि
र्द्वे द्वे चैव लिपी बहिश्च रचयेद्भूयस्तथा त्रिष्टुभम्।
वर्णान्प्रानुगतांश्च भूपुरयुगे सिंहाख्यचिन्तामणिं
लिख्याद्यन्त्रमशेषदुःखशमनायोक्तं पुरा देशिकैः ॥ १०.८ ॥
बहिरपि षोडशपत्रं
वृत्तविचित्रं च राशिवीथियुतम्।
रचयेन्मण्डलमेवं
पुनर्यथोक्तं निधापयेत्कलशम् ॥ १०.९ ॥
आदावङ्गावरणमनु हृल्लेखिकाद्याश्चतस्रो
ब्रह्माण्याद्याः षोडशविकृतिद्वन्द्वसंख्याक्रमेण।
मार्धं भूयश्चतसृभिरथो षष्टिभिर्लोकपालै
र्वज्राद्यैरष्टममपि समभ्यर्चयेद्भक्तिनम्रः ॥ १०.१० ॥
कराली विकराली च उमा देवी सरस्वती।
दुर्गा शची उषा लक्ष्मीः श्रुतिः स्मृतिधृती तथा ॥ १०.११ ॥
श्रद्धा मेधा मतिः कान्तिरार्या षोडश शक्तयः।
विद्याह्रीपुष्टयः प्रज्ञा सिनीवाली कुहूस्तथा ॥ १०.१२ ॥
रुद्रवीर्या प्रभानन्दा पोषणी ऋद्धिदा शुभा।
कालरात्री महारात्री भद्रकाली कपालिनी ॥ १०.१३ ॥
विकृतिर्दण्डिमुण्डिन्यौ सेन्दुखण्डा शिखण्डिनी।
निसुम्भसुम्भमथनी महिषासुरमर्दिनी ॥ १०.१४ ॥
इन्द्राणी चैव रुद्राणी शंकरार्धशरीरिणी।
नारी नारायणी चैव त्रिशूलिन्यपि पालिनी ॥ १०.१५ ॥
अम्बिका ह्लादिनी चैव द्वात्रिंशच्छक्तयो मताः।
पिङ्गलाक्षी विशालाक्षी समृद्धिर्वृद्धिरेव च ॥ १०.१६ ॥
श्रद्धा स्वाहा स्वधाख्या च मायाभिख्या वसुंधरा।
त्रिलोकधात्री गायत्री सावित्री त्रिदशेश्वरी ॥ १०.१७ ॥
सुरूपा बहुरूपा च स्कन्दमाताच्युतप्रिया।
विमला सामला चैव अरुणी वारुणी तथा ॥ १०.१८ ॥
प्रकृतिर्विकृतिः सृष्टिः स्थितिः संहृतिरेव च।
संध्या माता सती हंसा मर्दिका वज्रिका परा ॥ १०.१९ ॥
देवमाता भगवती देवकी कमलासना।
त्रिमुखीसप्तमुख्यौ च सुरासुरविमर्दिनी ॥ १०.२० ॥
सलम्बोष्ठ्यूर्ध्वकेश्यौ च बहुशिश्ना वृकोदरी।
रथरेखाह्वया चैव शशिरेखा तथापरा ॥ १०.२१ ॥
पुनर्गगनवेगाख्या वेगा च पवनादिका।
भूयो भुवनवेगाख्या तथैव मदनातुरा ॥ १०.२२ ॥
अनङ्गानङ्गमदना भूयश्चानङ्गमेखला।
अनङ्गकुसुमा विश्वरूपासुरभयंकरी ॥ १०.२३ ॥
अक्षोभ्यासत्यवादिन्यौ वज्ररूपा शुचिव्रता।
वरदा चैव वागीशी चतुःषष्टिः प्रकीर्तिताः ॥ १०.२४ ॥
इष्ट्वा यथोक्तमिति तं कलशं निजं वा
पुत्रं तथाप्तमपि शिष्यमथाभिषिञ्चेत्।
आस्तिक्ययुक्तमथ सत्यरतं वदान्यं
विप्रप्रियं कुलकरं च नृपोत्तमं वा ॥ १०.२५ ॥
विधानमेतत्सकलार्थसिद्धि
करं परं पावनमिन्दिराढ्यम्।
आयुष्करं वश्यकरं रिपूणां
प्रध्वंसनं मुक्तिफलप्रदं च ॥ १०.२६ ॥
पाशाङ्कुशमध्यगया
शक्त्याथ जपार्चनाहुतादियुतम्।
वक्ष्ये यन्त्रविधानं
त्रैलोक्यप्राभृतायमानमिदम् ॥ १०.२७ ॥
अष्टाशात्तार्गलाविर्हगलयवरगाच्पूर्वपाश्चात्त्यषट्कं
कोष्ठोद्यत्साङ्गसाष्टाक्षरयुगयुगलाष्टाक्षराख्यं बहिश्च।
मायोपेतात्मयुग्मस्वरमिलितलसत्केसरं साष्टपत्रं
पद्मं तन्मध्यवर्तित्रितयपरिलसत्पाशशक्त्यङ्कुशार्णम् ॥ १०.२८ ॥
पाशाङ्कुशावृतमनुप्रतिलोमगैश्च
वर्णैः सरोजपुटितेन घटेन चापि।
आवीतमिष्टफलभद्रघटं तदेत
द्यन्त्रोत्तमं भुवि घटार्गलनामधेयम् ॥ १०.२९ ॥
प्राक्प्रत्यगर्गले हल
मथ पुनराग्नेयमारुते च हयम्।
दक्षोत्तरे हवार्णं
नैःऋतशैवे हरं द्विपङ्क्ति लिखेत् ॥ १०.३० ॥
विलिखेच्च कर्णिकायां
पाशाङ्कुशसाध्यसंयुतां शक्तिम्।
अभ्यन्तराष्टकोष्ठे
ष्वङ्गान्यवशेषितेषु चाष्टार्णौ ॥ १०.३१ ॥
कोष्ठेषु षोडशस्वथ
षोडशवर्णं तथा मनुं मन्त्री।
पद्मस्य केसरेष्वथ
युगस्वरात्मान्वितां तथा मायाम् ॥ १०.३२ ॥
एकैकेषु दलेषु
त्रिशस्त्रिशः कर्णिकागतान्वर्णान्।
पाशाङ्कुशबीजाभ्यां
प्रवेष्टयेद्बाह्यतश्च नलिनस्य ॥ १०.३३ ॥
अनुलोमविलोमगतैः
प्रवेष्टयेदक्षरैश्च तद्बाह्ये।
तदनु घटेन सरोज
स्थितेन तद्वक्त्रकेऽम्बुजं च लिखेत् ॥ १०.३४ ॥
बिन्द्वन्तिका प्रतिष्ठा
संदिष्टा पाशबीजमिति मुनिभिः।
निजभूर्दहनाप्यायिनि
शशधरखण्डान्वितोऽङ्कुशो भवति ॥ १०.३५ ॥
पाशश्रीशक्तिस्वर
मन्मथशक्तीन्दिराङ्कुशाश्चेति।
एकं कामिनिरञ्जिनि
ठद्वयमपरं त्विहाष्टवर्णं स्यात् ॥ १०.३६ ॥
अथ गौरि रुद्रदयिते
योगेश्वरि सकवचास्त्रठद्वितयैः।
बीजादिकमिदमुक्तं
शाक्तेयं षोडशाक्षरं मन्त्रम् ॥ १०.३७ ॥
इति कृतदलसुविभूषित
मतिरुचिरं लोकनयनचित्तहरम्।
कृतोज्ज्वलं मण्डलमपि
पीठाद्यं पुरेव परिपूज्य ॥ १०.३८ ॥
पूर्वप्रोक्तैः क्वाथै
रेकेनापूर्य पूरयेत्कलशम्।
हृल्लेखाद्यङ्गाख्यौ
मात्रसुरेशादिकौ च कुलिशादिम् ॥ १०.३९ ॥
एवं संपूज्य देवीं कलशमनुशुभैर्गन्धपुष्पादिकैस्ता
न्दध्याज्यक्षौद्रसिक्तैस्त्रिशतमथ पृथग्दुग्धवीरुत्समिद्भिः।
हुत्वा दत्वा सुवर्णांशुकपशुधरणीर्दक्षिणार्थं द्विजेभ्यः
संपूज्याचार्यवर्यं वसुभिरमलधीः संयतात्माभिषिञ्चेत् ॥ १०.४० ॥
इति कृतकलशोऽयं सिच्यते येन पुंसा
स भवति कविरेनं नित्यमालिङ्गति श्रीः।
धनदिनरजनीशैस्तुल्यतेजा महिम्ना
निरुपमचरितोऽसौ देहिनां स्यात्पुरोगः ॥ १०.४१ ॥
जपेच्चतुर्विंशतिलक्षमेवं
सुयन्त्रितो मन्त्रवरं यथावत्।
हविष्यभोजी परिपूर्णसंख्ये
जपे पुनर्होमविधिर्विधेयः ॥ १०.४२ ॥
पयोद्रुमाणां च समित्सहस्र
षट्कैर्दधिक्षौद्रघृतावसिक्तैः।
तिलैश्च तावज्जुहुयात्पयोक्तै
र्द्विजोत्तमानभ्यवहारयेच्च ॥ १०.४३ ॥
गुरुमपि परिपूज्य काञ्चनाद्यै
र्जपति च मन्त्रमथो सहस्रमात्रम्।
भजति च दिनशोऽमुमर्चनायां
विधिविहितं विधिमादरेण भूयः ॥ १०.४४ ॥
संक्षेपतो निगदितो विधिरर्चनायाः
शक्तेरमुं भजतु संसृतिमोचनाय।
कान्त्यै श्रियै च यशसे जनरञ्जनाय
सिद्ध्यै प्रसिद्धमहसोऽस्य परस्य धाम्नः ॥ १०.४५ ॥
गजमृगमदकाश्मीरै
र्मन्त्रितमः सुरभिरोचनोपेतैः।
विलिखेदलक्तकरसा
लुलितैर्यन्त्राणि सकलकार्यार्थी ॥ १०.४६ ॥
राज्या पटुसंयुतया
सपाशशक्त्यङ्कुशेन मन्त्रेण।
स्वाद्वक्तयाभिजुह्व
न्निश्युर्वीशांस्तथोर्वशीं वशयेत् ॥ १०.४७ ॥
एभिर्विधानैर्भुवनेश्वरीं तां
समर्चयित्वाथ जपंश्च मन्त्री।
स्तुत्यानयाभिष्टुवतां समग्र
प्रीत्यै समस्तार्तिविभञ्जिकायाः ॥ १०.४८ ॥
प्रसीद प्रपञ्चस्वरूपे प्रधाने
प्रकृत्यात्मिके प्राणिनां प्राणसंज्ञे।
प्रणोतुं प्रभो प्रारभे प्राञ्जलिस्त्वां
प्रकृत्याप्रतर्क्ये प्रकामप्रवृत्ते ॥ १०.४९ ॥
स्तुतिर्वाक्यबद्धा पदात्मैव वाक्यं
पदं त्वक्षरात्माक्षरस्त्वं महेशि।
ध्रुवं त्वां त्वमेवाक्षरैस्त्वन्मयैस्तो
ष्यसि त्वन्मयी वाक्प्रवृत्तिर्यतः स्यात् ॥ १०.५० ॥
अजाधोक्षजत्रीक्षणाश्चापि रूपं
परं नाभिजानन्ति मायामयं ते।
स्तुवन्तीशि तां त्वाममी स्थूलरूपां
तदेतावदम्बेह युक्तं ममापि ॥ १०.५१ ॥
नमस्ते समस्तेशि बिन्दुस्वरूपे
नमस्ते रवत्वेन तत्त्वाभिधाने।
नमस्ते महत्त्वं प्रपन्ने प्रधाने
नमस्ते त्वहंकारतत्त्वस्वरूपे ॥ १०.५२ ॥
नमः शब्दरूपे नमो व्योमरूपे
नमः स्पर्शरूपे नमो वायुरूपे।
नमो रूपतेजोरसांभःस्वरूपे
नमस्तेऽस्तु गन्धात्मिके भूस्वरूपे ॥ १०.५३ ॥
नमः श्रोत्रचर्माक्षिजिह्वाख्यनासा
सवाक्पाणिपत्पायुसोपस्थरूपे।
मनोबुद्ध्यहंकारचित्तस्वरूपे
विरूपे नमस्ते विभो विश्वरूपे ॥ १०.५४ ॥
रवित्वेन भूत्वान्तरात्मा दधासि
प्रजाश्चन्द्रमस्त्वेन पुष्णासि भूयः।
दहस्यग्निमूर्तिं वहन्त्याहृतं वा
महादेवि तेजस्त्रयं त्वत्त एव ॥ १०.५५ ॥
चतुर्वक्त्रयुक्ता लसद्धंसवाहा
रजः संश्रिता ब्रह्मसंज्ञां दधाना।
जगत्सृष्टिकार्यं जगन्मातृभूते
परं तत्पदं ध्यायसीशि त्वमेव ॥ १०.५६ ॥
विराजत्किरीटा लसच्चक्रशङ्खा
वहन्ती च नारायणाख्यां जगत्सु।
गुणं सत्त्वमास्थाय विश्वस्थितिं यः
करोतीह सोंशोऽपि देवि त्वमेव ॥ १०.५७ ॥
जटाबद्धचन्द्राहिगङ्गा त्रिणेत्रा
जगत्संहरन्ती च कल्पावसाने।
तमः संश्रिता रुद्रसंज्ञां दधाना
वहन्ती परश्वक्षमाले विभासि ॥ १०.५८ ॥
सचिन्ताक्षमाला सुधाकुम्भलेखा
धरा त्रीक्षणार्धेन्दुराजत्कपर्दा।
सुशुक्लांशुकाकल्पदेहा सरस्व
त्यपि त्वन्मयैवेशि वाचामधीशा ॥ १०.५९ ॥
लसच्चक्रशङ्खा चलत्खङ्गभीमा
नदत्सिंहवाहा ज्वलत्तुङ्गमौलिः।
द्रवद्दैत्यवर्गा स्तुवत्सिद्धसंघा
त्वमेवेशि दुर्गा विसर्गाविहीने ॥ १०.६० ॥
पुरारातिदेहार्धभागो भवानी
गिरीन्द्रात्मजात्वेन यैषा विभासि।
महायोगिवन्द्यां महेशासुनाथा
महेश्यंबिका तत्त्वतस्त्वन्मयैव ॥ १०.६१ ॥
लसत्कौस्तुभोद्भासिते व्योमनीले
वसन्ती च वक्षःस्थले कैटभारेः।
जगद्वल्लभां सर्वलोकैकनाथां
श्रियं तां महादेव्यहं त्वामवैमि ॥ १०.६२ ॥
अजाद्रीगुहाब्जाक्षपोत्रीन्द्रकाणां
महाभैरवस्यापि चिह्नं वहन्त्यः।
विभो मातरः सप्ततद्रूपरूपाः
स्फुरन्त्यस्त्वदंशा महादेवि ताश्च ॥ १०.६३ ॥
समुद्यद्दिवाकृत्सहस्रप्रभासा
सदा संतताशेषविश्वावकाशे।
लसन्मौलिबद्धेन्दुरेखे सपाशा
ङ्कुशाभीत्यभीष्टात्तहस्ते नमस्ते ॥ १०.६४ ॥
प्रभाकीर्त्तिकान्तीन्दिरारात्रिसंध्या
क्रियाशातमिस्राक्षुधाबुद्धिमेधाः।
स्तुतिर्वाङ् मतिः संनतिः श्रीश्च शक्ति
स्त्वमेवेशि येऽन्ये च शक्तिप्रभेदाः ॥ १०.६५ ॥
हरे बिन्दुनादैः सशक्त्याख्यशान्तै
र्नमस्तेऽस्तु भेदैः प्रभिन्नैरभिन्ने।
सदा सप्तपाताललोकाचलाब्धि
ग्रहद्वीपधातुस्वरादिस्वरूपे ॥ १०.६६ ॥
नमस्ते नमस्ते समस्तस्वरूपे
समस्तेषु वस्तुष्वनुस्यूतशक्ते।
अतिस्थूलसूक्ष्मस्वरूपे महेशि
स्मृते बोधरूपेऽप्यबोधस्वरूपे ॥ १०.६७ ॥
मनोवृत्तिरस्तु स्मृतिस्ते समस्ता
तथा वाक्प्रवृत्तिः स्तुतिः स्यान्महेशि।
शरीरप्रवृत्तिः प्रणामक्रिया स्या
त्प्रसीद क्षमस्व प्रभो संततं मे ॥ १०.६८ ॥
हृल्लेखाजपविधिमर्चनाविशेषा
नेतांस्तां स्तुतिमपि नित्यमादरेण।
योऽभ्यस्येत्स खलु परां श्रियं च गत्वा
शुद्धं तद्व्रजति पदं परस्य धाम्नः ॥ १०.६९ ॥
इति हृल्लेखाविहितो
विधिरुक्तः संग्रहेण सकलोऽयम्।
अस्मिन्निष्णातमना
मन्त्री योगी स एव भोगी च ॥ १०.७० ॥
इति श्रीमत्परमहंसपरिव्राजकाचार्यस्य
श्रीगोविन्दभगवत्पूज्यपादशिष्यस्य
श्रीमच्छंकरभगवतः कृतौ
प्रपञ्चसारे दशमः पटलः ॥