०१ अभ्युदयम्

परेद्युः प्रातःकालिकनित्यकर्माणि औपासनान्तं कृत्वा, पत्न्या सह प्राणानायम्य, गर्भाधानकर्माङ्गमभ्युदयश्राद्धं करिष्य इति सङ्कल्प्य, अन्नेन आमेन हिरण्येन वा कुर्यात् । हिरण्यपक्षे -

इत्युक्त्वा, वसुसत्याख्यविश्वेभ्यो देवेभ्यः नान्दीमुखाभ्यः मातृपितामहीप्रपितामहीभ्यः, नान्दीमुखेभ्यः पितृपितामहप्रपितामहेभ्यः, नान्दीमुखेभ्यः मातामहमातुःपितामहमातुःप्रपितामहेभ्यः, नान्दीश्राद्धसंरक्षकश्रीमहाविष्णवे च इदं हिरण्यम् इति हिरण्यं निधाय ।

अनेन नान्दीमुखेन (सत्यवसुसंज्ञयक) वसुसत्याख्यविश्वदेवरूपी, नान्दीमुख (प्रपितामहि-पितामहि-मातृस्वरूपि, प्रपितामह-पितामह-पितृस्वरूपी) मातृपितामहीप्रपितामहीरूपी, नान्दीमुखपितृपितामहप्रपितामहरूपी, नान्दीमुखसपत्नीकमातामहमातुःपितामहमातुःप्रपितामहरूपी, नान्दीश्राद्धसंरक्षकश्रीमहाविष्णुस्वरूपी,
सर्वाकारो भगवान् स एव श्रीजनार्दनः प्रीयताम्

इति साक्षतं जलं हिरण्योपरि निनीय

इदं हिरण्यं नानागोत्रेभ्यः श्रीवैष्णवेभ्यस्तेभ्यः तेभ्यः सम्प्रददे, न मम

इति साक्षतं जलं निस्राव्य,
ब्राह्मणेभ्यो दद्यात् ॥