यक्ष्मवारणम्

अ॒क्षीभ्या॑न् ते॒ नासि॑काभ्यां॒
कर्णा॑भ्यां॒ चुबु॑का॒दधि॑ ।
यक्ष्मꣳ॑ शीर्ष॒ण्यं॑ म॒स्तिष्का॑ज्
जि॒ह्वाया॒ विवृ॑हामि+++(=संमृज्य निरस्यामि)+++ ते ।

ग्री॒वाभ्य॑स्+++(→पर्वभेदेन बहुवचनम्)+++ त उ॒ष्णिहा॑भ्यः॒+++(=ग्रीवापृष्ठमूलभ्यः)+++
कीक॑साभ्यो+++(=अस्थिभ्यो)+++ ऽनू॒क्या॑त्+++(=पृष्ठंवशात्)+++ ।
यक्ष्मं॑ दोष॒ण्य॑म् अꣳसा॑भ्यां
बा॒हुभ्यां॒ विवृ॑हामि ते ।

आ॒न्त्रेभ्य॑स् ते॒ गुदा॑भ्यो
वनि॒ष्ठोर्+++(=वपाया)+++ हृद॑या॒द् अधि॑ ।
यक्ष्मं॒ मत॑स्नाभ्यां+++(=फुप्फुसाभ्याम्?)+++ य॒क्नः+++(=यकृतः)+++
प्ला॒शिभ्यो॒+++(=पर्शुभ्यः)+++ विवृ॑हामि ते ।

ऊ॒रुभ्या॑न् ते ऽष्ठी॒वद्भ्यां॒+++(=ऊरुजान्वोः सन्धिभ्याम्)+++
जङ्घा॑भ्यां॒ प्रप॑दाभ्याम् ।
यक्ष्म॒२ꣳ॒ श्रोणी॑भ्यां भा॒सदा॑द्+++(=गुह्यप्रदेशात्)+++
ध्व॒ꣳ॒ससो॒+++(=नाभेः/ गुदवलयात्)+++ विवृ॑हामि ते ।

मेह॑नाद्वनं॒कर॑णा॒ल्लोम॑भ्यस्ते न॒खेभ्यः॑ ।
यक्ष्मं॒ सर्व॑स्मादा॒त्मन॒स्तमि॒दं वि वृ॑हामि ते ॥

अङ्गा॑दङ्गा॒ल्लोम्नो॑लोम्नो जा॒तं पर्व॑णिपर्वणि ।
यक्ष्मं॒ सर्व॑स्मादा॒त्मन॒स्तमि॒दं वि वृ॑हामि ते ॥