संस्कृते विश्वासटिप्पन्यः

इ

{व्यपे}
इ (इण् गतौ)।
‘यथा काष्ठं च काष्ठं च समेयातां महोदधौ। समेत्य च व्यपेयातां तद्वद् भूतसमागमः’ (भा० शां० १७४।१५)॥
‘समेत्य तु व्यपेयातां कालमासाद्य कंचन’ (रा० २।१०५।२६)। व्यपेयाताम्=वियुज्येयाताम्, विश्लेषमाप्नुयाताम्।
‘न खलु तदुपश्लेषादस्य व्यपैति रुचिर्मनाक्’ (प्र० च०)। व्यपैति अपयाति। अपचीयते।
‘स्मृत्याचारव्यपेतेन मार्गेण’ (याज्ञ० २।५)। अपेतो व्यपेत इत्यनर्थान्तरम्। विश्लिष्टः, पृथग् भूतः। विरुद्ध इति त्वार्थिकोऽर्थः।
‘वृथान्नाचमनोत्थानव्यपेतानि’ (गौ० ध० २।८।१९)। अपेतादन्यद् व्यपेतं संहितमिति हरदत्तः।
‘स्वस्थोऽव्यपेतः पश्यामि भूतानां प्रभवाप्ययौ’ (भा० शां० २२२।२९)। अव्यपेतः=देहाद्यभिमानेन स्वरूपादप्रच्युत इति नीलकण्ठः।
‘शुचिव्यपाये वनराजिपल्वलम्’ (रघु० ३।३)। शुचिव्यपायो निदाघविगमः, वर्षोपक्रमः।

ईक्ष्

{व्यपेक्ष्}
ईक्ष् (ईक्ष दर्शने)।
‘न व्यपैक्षत समुत्सुकाः प्रजाः’ (रघु० १९।६)। न व्यपैक्षत नावैक्षत। नादृतवानित्यर्थः। समुत्सुका दर्शनकाङ्क्षिणीः।
‘व्यपेक्षा नैव कर्तव्या गतोऽस्तमिति भास्करः’ (भा० द्रोण० १४६।६६)। व्यपेक्षाऽऽदरः।
‘धर्मं समाचर कुरु स्वजनव्यपेक्षाम्’ (दूतघट० १।५२)। उक्तपूर्व एवार्थः।
‘वरेषुधी चापधरौ परन्तपौ व्यपेक्षमाणौ सह सीतया गतौ’ (रा० २।८६।२५)। व्यपेक्षमाणौ सावेक्षौ सावधानौ। अवेक्षा प्रतिजागरः।

ऊह्

{व्यपोह्}
ऊह् (ऊह वितर्के)।
‘तदेतन्मे मनोदुःखं व्यपोह त्वं पितामह’ (भा० अनु० १३७।१)। व्यपोह=अपाकुरु।
‘क्षुधा निर्णुदति प्रज्ञां धर्मबुद्धिं व्यपोहति’ (भा० आश्व० ९०।९०)। अपाकरोति, अपनयति, अपहरतीत्याह।
‘पूर्वां सन्ध्यां जपंस्तिष्ठन्नैशमेनो व्यपोहति’ (मनु० २।१०२)। उक्तोऽर्थः।
‘व्रात्यानां याजनं कृत्वा परेषामन्त्यकर्म च। अभिचारमहीनं च त्रिभिः कृच्छ्रैर्व्यपोहति’ (मनु० ११।१९७)॥ पापमिति शेषः।
‘दुर्योधनो मदेनैव क्षमं राष्ट्रं व्यपोहति’ (भा० सभा० ६३।३)। व्यपोहति विनाशयति।
‘एवं मनोधारणया क्रमेण व्यपोह्य किञ्चित्समुपोह्य किंचित्’ (सौन्दर० १६।१)। व्यपोह्य दूरीकृत्य, व्यपवर्त्य।

कृष्

{व्यपकृष्}
कृष् (कृष विलेखने)।
‘यैरभ्युपायैरेनांसि मानवो व्यपकर्षति’ (मनु० ११।२१०)। व्यपकर्षति निर्णुदति निरस्यति।
‘नास्ति लज्जा हि ते सीतां चौरवद् व्यपकर्षतः’ (रा० ६।८८।२२)। व्यपकर्षतोऽपहरतः।
‘अद्य धर्मात्मता चैव व्यपकृष्टा युधिष्ठिरात्’ (भा० सभा० ३७।२४)। व्यपकृष्टा दूरं गता।
‘व्यपकृष्टाम्बरां दृष्ट्वा तामृषिश्चकमे ततः’ (भा० आदि० १३०।३६)। व्यपकृष्टाम्बरां त्रस्तवस्त्राम्।

क्रम्

{व्यपक्रम्}
क्रम् (क्रमु पादविक्षेपे)।
‘प्रक्षाल्य च तयोः पादौ व्यपाक्रामत्’ (रा० २।८७।२१)। व्यपाक्रामत्=अपाक्रामत्, अपासरत्।

गम्

{व्यपगम्}
गम् (गम्लृ गतौ)।
‘क्षुत्पिपासे च सर्वेषां क्षणेन व्यपगच्छताम्’ (भा० वन०)। व्यपगच्छतां व्यपागच्छताम् अनश्यताम्।
‘धर्माद् व्यपगतः’ (रा० ४।१७।५०)। धर्मात्प्रच्युत इत्याह।
‘अर्कात्सिते द्वितीये बुधेऽथवा युगपदेव स्थितयोः। व्यपगतयोर्वा’ (बृ० सं० ८।३९)। व्यपगतयोर्विप्रकृष्टयोः सान्तरयोः।

तन्

{व्यपतन्}
तन् (तनु विस्तारे)।
‘स यथा स्पन्दनां रज्जुभि र्व्यपतत्य दुह्युः’ (जै० ब्रा० २।३)। व्यपतत्य परितो बद्ध्वा।

त्रप्

{व्यपत्रप्}
त्रप् (त्रपूष् लज्जायाम्)।
‘न व्यपत्रपसे नीच कर्मणाऽनेन रावण’ (रा० ३।५३।३)। व्यपत्रपसे अपत्रपसे जिह्रेषि लज्जसे व्रीड्यसि।

दिश्

{व्यपदिश्}
दिश् (दिश अतिसर्जने)।
‘मित्रं च मां व्यपदिशस्यपरं च यासि’ (चारु० ४।४)। व्यपदिशसि सम्बोधयसि आलपसि। मित्रं च मां व्यपदिशसि विपरीतं च मयि व्यवहरसि। तदसाम्प्रतम् (इति वयम्)।
‘तेन पुरुषो बध्यते पुरुषो मुच्यते पुरुषः संसरतीति व्यपदिश्यते येन संसारित्वं विद्यते’ (गौड० साङ्ख्य० का० ६२ )। व्यपदिश्यते व्यवह्रियते। इति तद्दुहितृत्वेन व्यपदिश्यते। तस्य दुहितेत्यभिलप्यते।
‘यदा चितिरेव पुरुषस्तदा किमत्र केन व्यपदिश्यते’ (यो० सू० १।९ भाष्ये)। व्यपदिश्यते विशेष्यते।
‘भ्रातरं राजराजानं महेश्वरसखं प्रभुम्। धनेश्वरं व्यपदिशन्। धनेश्वरं भ्रातेति कीर्तयन् इत्यर्थः।
‘कुलं व्यपदिशन्वीर समरे कोऽभिधास्यति’ (रा० ३।२९।१९)। कुलं व्यपदिशन् कुलीनत्वं प्रख्यापयन्। अभिधास्यति स्वस्तवमिति शेषः।
‘कथं वैश्रवणं देवं सर्वदेवनमस्कृतम्। हितमुक्तं त्वया देवि स्निग्धया सदृशं वचः॥ कुलं व्यपदिशन्त्या च धर्मज्ञे जनकात्मजे’ (रा० ३।१०।२)। उक्तोऽर्थः।
‘भ्रातरं व्यपदिश्य त्वमशुभं कर्तुमिच्छसि’ (रा० ३।४८।२१)। वैश्रवणो मम भ्रातेति कीर्तयित्वेत्यर्थः।
‘श्लाघ्या च व्यपदेश्या च यथा देवी ह्यरुन्धती’ (रा० ३।१३।७)। व्यपदेश्या महति कुले प्रसूततया कीर्तनीया।
‘नारी सौजन्यचर्चासु व्यपदेश्या भविष्यसि’ (यो० वा० ६ (१) १०९।३१)। व्यपदेश्या विशिष्य कीर्तनीया।
‘अलं ते व्यपदेशेन प्रमाणा यदि ते वयम्’ (भा० आश्व० ५७।१४)। व्यपदेशो व्याजः। प्रमाणाः प्रमाणम्।
‘इत्यनुमानं व्यपदेशादवगम्यते, प्रत्यक्षस्तु वेदवचनेन प्रत्ययः’ (मी० शा० भा० १।१।२)। व्यपदेशोऽपदेशो हेतुः।
‘कापि कुन्तलसंव्यानसंयमव्यपदेशतः। बाहुमूल स्तनौ नाभिपङ्कजं दर्शयेत्स्फुटम्’ (सा० द० ३।१२६)॥ व्यपदेशो व्याजः।
‘व्यपदेशमाविलयितुं किमीहसे जनमिमं च पातयितुम्’ (शा० ५।२१)। व्यपदेशः कुलम्।
‘व्यादेशकुले जाताः पूजिताश्चाप्यभीक्ष्णशः’ (रा० ४।६४।२१)। विगतोऽपदेशः कलङ्को यस्मात्तादृशे कुले।
‘महाकुलप्रसूतस्य वसिष्ठव्यपदेशिनः’ (रा० १।१९।२)। वसिष्ठव्यपदेशिनो वसिष्ठगोत्रजस्य। कतकस्त्वन्यथा त्याचष्टे। व्यपदेशो नियोगोऽस्यास्तीति तस्येति।
‘असौ गौरसावश्व इत्येवमेवैतद् व्यपदिष्टं भवति’ (श० ब्रा० १४।६।५।१)। व्यपदिष्टं व्यवहृतं भवति। गौरित्यादिनामधेयप्रयोगोऽस्य भवति।
‘महाकुलप्रसूतस्य वसिष्ठव्यपदेशिनः’ (रा० १।१९।२)। अथन्तिरन्यासाय पुनर्न्यासः। व्यपदेशः कीर्तिरुपदेशो वेति गोविन्दराजः। तीर्थो पि तमनुकरोति यदाह वसिष्ठोपदेशवत इति। अत्रार्थे व्यपदेशशब्दस्य रूढिर्नास्तीत्यवश्यवाच्यम्।

दृश्

{व्यपदृश्}
दृश् (दृशिर् प्रेक्षणे)।
‘न वै किञ्चिद् व्यपदृश्यते भूतं तमोभूते सायकैरन्तरिक्षे’ (भा० द्रोण० १७९।२२)। व्यपदृश्यते व्यक्तिपरिच्छेदेन दृष्टेर्विषयो भवतीत्याह। प्रज्ञायत इति वा। प्रापतत्तत्रेति पाठान्तरम्। तदसङ्गतम्।

नश्

{व्यपनश्}
नश् (णश अदर्शने)।
‘यस्ते युद्धमयं दर्पं कामं च व्यपनाशयेत्’ (भा०) व्यपनाशयेत् विनाशयेत्।

नी

{व्यपनी}
नी (णीञ् प्रापणे)।
‘व्यपनिन्युः सुदुःखार्तां कौसल्यां व्यावहारिकाः’ (रा० २।६६।१३)। व्यपनिन्युर व्यपचकृषुः, ततोऽन्यत्र निन्युः।
‘न दैवं व्यपनयति विमार्गं नास्ति दैवे प्रभुत्वम्’ (भा० अनु० ६।४७)। व्यपावपार्थकौ। नयतीत्येव पर्याप्तम्। विप्रकर्षविरोधयोर्विमार्गशब्देनैवोक्तेः। व्यावहारिका व्यवहारे नियुक्ता अमात्यादयः।
‘शरे तु तस्मिन्व्यपनीतमात्रे’ (गोरेसियो सं० रा० २।६५।४६)। व्यपनीतमात्रे समुद्धृत एव।
‘तन्मया त्वत्कृते ह्येतदन्यथा व्यपनायितम्’ (भा० द्रोण० २९।३७)। अस्त्रमित्यनुषङ्गः। अन्यत्र प्रापितं हारितम् इत्यर्थः। व्यपनामितमिति पाठान्तरम्। अर्थस्तु निर्विशेषः।

नुद्

{व्यपनुद्}
नुद् (णुद प्रेरणे)।
‘अलक्ष्मीं व्यपनोत्स्यथ’ (भा० वन० १०६९५)। व्यपनोत्स्यथ विप्रक्रक्ष्यथ।
‘परिवेष्टनमेतेषां क्षिप्रं चैव व्यपानुद’ (भा० वि० ४१।८)।
‘ज्येष्ठस्य पाण्डुपुत्रस्य शोकं भीष्म व्यपानुद’ (भा० शां० ५०।३१)। व्यपानुद व्यपकर्ष। व्यपानुदेत्यत्रापशब्दस्य च्छान्दसो दीर्घ इति केचित्।

या

{व्यपया}
(या प्रापणे, प्रापणमिह गतिः)।
‘तथैव गच्छतस्तस्य व्यपायाद्रजनी शिवा’ (रा० २।४९।२)। व्यपायात् व्यत्यैत्, अत्यक्रामत्।
‘व्यपयाहि रणादितः’ (भा० उ० १८५।१३)। निर्याहि, अपवाहयात्मानम् इति वाक्यार्थः।
‘संस्मरन्तो विमनसो व्यपयाता नराधिप’ (भा० सभा० १४।४८)। व्यपयाता विप्रस्थिताः।
‘व्यपयातेषु वासाय सैन्येषु’ (भा० द्रोण० ७२।२)। सर्वेष्विति पाठान्तरम्। उक्तोऽर्थः।

रुध्

{व्यपरुध्}
रुध् (रुधिर् आवरणे)।
‘अतिक्रान्तवया राजा मा स्मैनं व्यपरोरुधः। कुमारराज्ये जीवस्व तस्यैवाज्ञाप्रवर्तनात्’ (रा० २।५८।२३)। अयं रामस्य भरताय सन्देशः। वृद्धं राजानं पितरं राज्यान्मा स्म भ्रंशयः, मा स्म तं राज्याद् विना करोरित्याह।

रुह्

{व्यपरुह्}
रुह् (रुह बीजजन्मनि)।
‘प्रीतिपूर्वं महाबाहुः प्राणैर्न व्यपरोपयत्’ (भा० आश्व० ७४।२०)। व्यपरोपयत् व्यपारोपयत्=व्ययूयुजत्। अररहत्। अत्याजयत्।
‘अधिरोप्य पादुके व्यपरोप्य च’ (गोरेसियो० रा० २।१२३।२१)। व्यपरोप्य=अवमुच्य।

वह्

{व्यपवह्}
वह् (वह प्रापणे)।
‘युक्त्या बल्लापुरादौ वो व्यपोढं व्यसनं मया’ (राज० ७।२७०)। व्यपोढं=दूरीकृतम्।
‘तया ते मानुषं कर्म व्यपोढम्’ (भा० ८।१६१०)। व्यपोढमाविर्भावितम्, प्राकाश्यं नीतम्।
‘व्यपोढे च ततो घोरे तस्मिंस्तेजसि भारत’ (भा० द्रोण० २००।२२)। व्यपोढेऽपगते प्रशान्ते।
‘व्यपोढपार्श्वैरपवर्तितत्रिकाः’ (कि० ४।१५)। व्यपोढानि विपरीतानि पार्श्वानि येषु तानि विकर्षणानि तैः।

वृज्

{व्यपवृज्}
वृज् (वृजि वृजी वर्जने)।
‘न तु सर्प इव त्वचं पुनः प्रतिपेदे व्यपवर्जितां श्रियम्’ (रघु० ८।१३)। व्यपवर्जिता परित्यक्ता। त्वङ् निर्मोकः।

वृत्

{व्यपवृत्}
वृत् (वृतु वर्तने)।
‘चेतः कथं कथमपि व्यपवर्तते मे’ (मालती० १।१८)।
‘दीप्रदीपा निशा जज्ञे व्यपवृत्तदिवाकरा’ (भामह का० ५।५१)। व्यपवृत्तदिवाकरा=विगतार्का, व्यर्का, अस्तमितसूर्या।

व्यध्

{व्यपव्यध्}
व्यध् (व्यध ताडने)।
‘आश्रमपदं व्यपविद्धबृसीमठम्’ (भा० वन०)। व्यपविद्धं विकीर्णं विशीर्णम्।

श्रि

{व्यपश्रि}
श्रि (श्रिञ् सेवायाम्)।
‘भवतु, पुत्र व्यपश्रयिष्ये तावदेनम्’ (मध्यम० १)। प्रार्थयिष्य इत्यर्थः।
‘व्यपश्रयिष्ये तावद् भवन्तम्’ (पञ्च० १)। अनन्तरोदीरित एवार्थः।
‘मित्राणि वा व्यपाश्रयेत्’ (कौ० अ० ४।३)। संश्रयेदित्यर्थः। अत्रापशब्दयोगो नार्थस्योपकरोति, प्रत्युत विरोधमिवाचरति। तथापि रूढ एष व्यवहार इत्यनुवृत्त्योऽकामेनापि।
‘ससादाथ च पाञ्चाल्यो व्यपाश्रयत च ध्वजम्’ (भा० द्रोण० २००।७१)। ध्वजदण्डं प्रतिश्रयमकरोदित्याह।
‘अद्य योत्स्येऽर्जनमहं पौरुषं स्वं व्यपाश्रितः’ (भा० द्रोण० १४५।३१)।
‘मां हि पार्थ व्यपाश्रित्य येपि स्युः पापयोनयः’ (गीता ९।३२)। व्यपाश्रित्य=आश्रित्य।
‘छिन्नो हि दक्षिणो बाहुः स हि तस्य व्यपाश्रयः’ (रा० ६।९१।१५)। व्यपाश्रय आश्रयः, अवलम्बः, अवष्टम्भः।
‘त्रिविधमौषधमिति दैवव्यपाश्रयं युक्तिव्यपाश्रयं सत्त्वावजयश्च’ (चरक० सू० ११।५४)। दैवव्यपाश्रयं विधितन्त्रम्।
‘निष्ठ्यूतोद्गीर्णवान्तादि गौणवृत्तिव्यपाश्रयम्’ (काव्यादर्शे १।९५)। व्यपाश्रय आश्रयः।
‘यतिष्यन्तेन राज्याय स हि तेषां व्यपाश्रयः’ (भा० आदि० २०१।१२)। व्यपाश्रयः संश्रयः शरणम्।
‘कथं तेषां जयो न स्याद्येषां धर्मो व्यपाश्रयः’ (भा० शल्य० १९।२७)। उक्तोऽर्थः।
‘हन्याच्छत्रून् व्यपाश्रयः’ (का० नी० सा० १८।५९।६२)। व्यपाश्रयः परमनाश्रितः, आत्मश्रित इत्यर्थः। आश्रयः पराश्रयः। स व्यपगतोऽस्य। इह व्यपौ स्थाने।
‘महती खल्वस्य व्यपाश्रयणा’ (स्वप्न० १)। प्रार्थनेत्यर्थः।

स्फुर्

{व्यपस्फुर्}
स्फुर् (स्फुर् स्फुल सञ्चलने)।
‘सोमे वोत्तरे व्यपस्फुरणश्रुतेरसम्भवाच्च’ (का० श्रौ० ५।३।३०)। व्यपस्फुरणं स्पर्धा।
‘व्यपस्फुरेते वा एते वेदिश्चोत्तरवेदिश्च’ (श० ब्रा०)। उक्तोऽर्थः।

हृ

{व्यपहृ}
हृ (हृञ् हरणे)।
‘व्यपाहरच्छिरः क्रुद्धश्चक्रेणामित्रकर्षणः’ (भा० सभा० ४५।२५)। व्यपाहरत्=अच्छिनत्।
‘सारथेश्चास्य वेगेन तुण्डेनैव महच्छिरः। पुनर्व्यपाहरत्’ (रा० ३।५१।१८)। उक्तपूर्व एवार्थः।