संस्कृते विश्वासटिप्पन्यः

अन्

{अनुप्राण्}
अन् (अन प्राणने)।
‘उत्प्रेक्षानुप्राणिता स्वभावोक्तिः’ (सा० द० १०)। अनुप्राणिता=समर्थिता=परिपोषिता।

अस्

{अनुप्रास्}
अस् (असु क्षेपे)।
‘वर्णसाम्यमनुप्रासः’ (का० प्र० ९।६९)।
‘अनुप्रासः शब्दसाम्यं वैषम्येपि स्वरस्य यत्’ (सा० द० १०।३)।
‘रसाद्यनुगतः प्रकृष्टो न्यासोऽनुप्रासः’ (का० प्र०)।

आप्

{अनुप्राप्}
आप् (आप्लृ व्याप्तौ)।
‘लीलाखेलमनुप्रापुर्महोक्षास्तस्य विक्रमम्’ (रघु० ४।२२)। अनुप्रापुरनुचक्रुर् इत्यर्थः।
‘ततः प्रावृडनुप्राप्ता’ (दशकु०)। ऋतुपर्यायेण प्राप्ता संनिहिता उपनतेत्यर्थः।

इ

{अनुप्रे}
इ (इण् गतौ)।
‘तं वः शर्धं रथानां त्वेषं गणं मारुतं नव्यसीनाम्। अनुप्रयन्ति वृष्टयः’ (ऋ० ५।??३।१०)। शर्धमनु प्रस्थिताः प्रारब्धा भवन्ति वृष्टय इत्याह।
‘क्षिप्रे हैषामपरोऽनुप्रैति’ (श० ब्रा० १३।८।१।७)। अनुप्रैति=अनुयाति। क्षिप्रे=क्षिप्रम्=अचिरेण।

कॄ

{अनुकॄ}
कॄ (कॄ विक्षेपे)।
‘सोत्कण्ठैरमरगणैरनुप्रकीर्णान्’ (कि० ७।२)। समन्तादावृतान् इत्यर्थः।

दा

{अनुप्रदा}
दा (डुदाञ् दाने)।
‘अनुप्रदानात्संसर्गात्स्थानाच्च करणादपि। ज्ञायते वर्णवैशेष्यं परिमाणाच्च पञ्चमात्’ (तै० प्रा० २।११)॥
‘त्रयीं विद्यां ब्रह्मचर्यं प्रजातिं श्रद्धां तपो यज्ञमनुप्रदानम्’ (आप० ध० २।२४।८)। अन्तर्वेदि बहिर्वेदि च दानमनुप्रदानम्।

धाव्

{अनुप्रधाव्}
धाव् (धावु गतिशुद्ध्योः)।
‘मामन प्र ते मनो वत्सं गौरिव धावतु पथा वारिव धावतु’ (ऋ० १०।१४५।६)। इदं निगदव्याख्यातम्।

नुद्

{अनुप्रणुद्}
नुद् (णुद प्रेरणे)।
‘अनुगृह्णीयान्नानुप्रणुदेत्’ (कौ० सू० ५६)। नानुप्रणुदेत्=न प्रत्याचक्षीत=न निराकुर्यात्।
‘अनु प्रणुन्ना रक्षोभिः सिंहैरिव महाद्विपाः’ (रा० ६।७।३६)। अनुप्रणुन्नाः=उत्सारितानुसृताः।**

पद्

{अनुप्रपद्}
पद् (पद गतौ)।
‘भावं न तस्याहमनुप्रपद्याम्’ (रा० ५।२८।५)। अनुप्रपद्याम्=अनुप्रपद्येय=प्रतिपद्येय, अभ्युपेयाम्।
‘एकस्य धर्मेण सतां मतेन सर्वे स्म तं मार्गमनुप्रपन्नाः’ (भा० वन० २९७।२५)। अनुप्रपन्नाः=अनुगताः=आस्थिताः। त्रयीधर्ममनुप्रपन्नाः=वेदमार्गानुयायिनः।

पा

{अनुप्रपा}
पा (पा पाने)।
‘अक्षरमक्षरमेव तद् देवता अनुप्रपिबन्ति’ (ऐ० ब्रा० २।३७)। अनुक्रमेण पातुमारभन्ते। अनुप्रयोरर्थवत्तेह दृश्या भवति।

भू

{अनुप्रभू}
भू (भू सत्तायाम्)।
‘सूर्यो विश्वमनुप्रभूतः’ (श० ब्रा० १०।६।३।२)। विश्वं व्यश्नुत इत्याह।
‘स एष जीवेनात्मनाऽनुप्रभूतः पेपीयमानो मोदमानस्तिष्ठति’ (छां० उ० ६।११।१)। अनुप्रभूतः=अभितो व्याप्तः।

या

{अनुप्रया}
या (या प्रापणे)।
‘आघातमद्यानुप्रयामि शामित्रमालब्धुमिवाध्वरेऽजः’ (मृच्छ० १०।२१)। अनुप्रयामि=अनुलक्ष्य प्रतिष्ठे।
‘तं प्रयान्तमनुप्रायात्’ (भा० उ० ८३।३०)। अनुप्रातिष्ठत, साकमयात्।

युज्

{अनुप्रयुज्}
युज् (युजिर् योगे)।
‘कृञ्चानुप्रयुज्यते लिटि’ (पा० ३।१।४०)। पश्चाद् अव्यवहितं प्रयुज्यत उच्चार्यत इत्यर्थः।
‘पश्चादनुप्रयुङ्क्षे तं विद्धस्य पदनीरिव’ (अथर्व० ११।२।१३)। अनुप्रयुङ्क्षेऽनुबध्नासि, निरन्तरमनुसरसीत्याह।
‘भगो अनुप्रयुङ्क्तामिन्द्र एतु पुरोगवः’ (अथर्व० १२।१।४०)। उक्तोऽर्थः। अनुवर्तताम्, अनुकरोत्विति वा गृह्यताम्।
‘तम् (अश्वमेधम्) इष्टिभिरनुप्रायुञ्जत’ (श० ब्रा० १३।१।४।१)। अन्वसरन्नित्यर्थः।
‘वरुणस्य सुषुवाणस्य दशधेन्द्रियं वीर्यं परापतत्… (वरुण आत्मानम्) अग्निना देवेन प्रथमेऽहन्ननु प्रायुङ्क्त’ (तै० ब्रा० १।८।१)। तत्रावश्यं विशेषार्थिना विशेषोऽनुप्रयोक्तव्यः। अनुकथ्यः।

वद्

{अनुप्रवद्}
वद् (वद व्यक्तायां वाचि)।
‘वाचं प्रोदितामनुप्रवदन्ति’ (ऐ० ब्रा० २। १५)। अनुप्रवदन्ति=पश्चाद् व्याहरन्ति।
‘तमेता ऋचोऽनुप्रवदन्ति’ (नि० १०।२०)। अनुप्रवदन्ति=अभिब्रुवन्ति। तमिति यमं प्रत्यवमृशति।

वह्

{अनुप्रवह्}
वह् (वह प्रापणे)।
‘यच्छक्नवाम तदनुप्रवोढुम्’ (ऋ० १०।२।३)। अनुप्रवोढुम्=अग्रतो गन्तुम्=प्रसर्तुम्।

विश्

{अनुप्रविश्}
विश् (विश प्रवेशने)।
‘यदि तत्राज्ञातमेव प्रवेष्टुं स्यादुपायः, किं करिष्यति भवान् (अविमारकः सहर्षम्) अनुप्रवेक्ष्यामि’ (अवि० ४)। अनुपदमपदान्तरं प्रवेक्ष्यामीत्याह।
‘विश्रम्य लौकिकाः सस्त्यायमनुप्रविशन्ति’ (महावीर०)। संकथामुपक्रमन्ते इत्यर्थः।
‘अनुप्रवेशादाद्यस्य पुंसस्ते नापि दुर्वहम्’ (रघु० १०।५१)। अनुप्रवेशात्=अधिष्ठानात्।
‘सखे वामदेव ! त्वमपि गाधिनन्दनमनुप्रविष्टोसि’ (अनर्घ० १)। तन्मतं परिगृहीतवानसि। यथा स चिन्तयति तथा त्वमपीत्याह।
‘पथिकसार्थं विदिशागामिनमनुप्रविष्टः’ (माल०)। तेन संगतः तदङ्गभावं गतः, तदेकदेशतामुपेतः।
‘बलवताभिभूतस्य विदेशगमनमनुप्रवेशो वा नीतिः’ (पञ्चत०)। अनुप्रवेशो विजेतृच्छन्दानुवृत्तिः।
‘भजते विदेशमधिकेन जितस्तदनुप्रवेशमथवा कुशलः’ (शिशु० ९।४८)। पञ्चतन्त्रोक्तार्थानुवाद एषः।
‘यस्य यस्य हि यो भावस्तस्य तस्य हि तं नरः। अनुप्रविश्य मेधावी क्षिप्रमात्मवशं नयेत्’ (पञ्चत० १।६८)॥ अनुप्रविश्य=आनुकूल्येनानुकूलाचरणेनाभिमतार्थकथनेन च तदात्मीयतामुपेत्य।

सञ्ज्

{अनुप्रसञ्ज्}
सञ्ज् (षञ्ज सङ्गे)।
‘अनेन हास्थ ते मर्त्येनात्मनैतं देवमात्मानमनुप्रसजन्ति’ (श० ब्रा० ९।३।४।१२)। अनुप्रसजन्ति=अभिसम्बध्नन्ति=संयुञ्जन्ति।

सद्

{अनुप्रसद्}
सद् (षद्लृ विशरणगत्यवसादनेषु)।
‘रोहिणीमृगलाञ्छनं साक्षीकृत्यार्यपुत्रमनुप्रसादयामि’ (विक्रम० ३)। अल्पार्थोऽनुः शक्यस्त्यक्तुम्।

हु

{अनुप्रहु}
हु (दानादनयोः)।
‘दिशोरन्तः परिध्यनुप्रहावयति’ (सत्या० श्रौ० २४।४।१०)। अनु प्रहावयति स्रावयति।

हृ

{अनुप्रहृ}
हृ (हृञ् हरणे)।
‘तन्मुहूर्तं धारयित्वानुप्रहरति’ (श० ब्रा० १।७।३।१७)। प्रास्यतीत्यर्थः। इहाप्यनुना नार्थः।
‘अभ्युक्ष्यैते (पवित्रे) अग्नावनुप्रहरेत्’ (द्रा० गृ० १।२।१५)। पश्चात् प्रक्षिपेदित्यर्थः।